Vítima dezastre naturál iha Baucau hamutuk uma-kain 247
BAUCAU, 29 fevereiru 2024 (TATOLI) – Serbisu Munisipál Protesaun Sivíl no Dezastre Naturál Baucau durante inísiu tinan-ne’e rejista inundasaun no inséndiu hamutuk 247.
Diretor Servisu Protesaun Sivíl no Dezatre Naturál Munísipiu Baucau, Clementino Pedro Barbosa, esplika, hosi numéru hirak-ne’e kauza hosi dezastre naturál ne’ebé impkatu hosi udan no anin sobu uma hamutuk 240 no inséndiu uma-lisan hitu.
“Hosi akontesementu ne’e laiha ema ruma mak lakon vida, maibe estraga de’it sasan,” Diretór Serbisu Munisipál Protesaun Sivíl no Dezastre Naturál hateten iha Vila Nova, kinta ne’e.
Protesaun Sivíl no Dezastre Naturál Bauucau rejista vítima sira maihosi postu administrativu neen, kompostu Baguia kmaan uma ualu, estragus natoon uma neen, estragu totál tolu no uma ida afeta ba inundasaun.
Husi Postu Baucau Vila estragus kmaan uma 26, estragus natoon uma 13, estragus totál ida, inklui uma neen hetan inséndiu, postu Laga estragu kmaan uma 29, estragus natoon uma aia, estragus totál rua.
Postu Quelicai hamutuk 53 kompostu husi estragus kmaan no afeta ba inséndiu no postu Vemasse uma tolu hetan estragus kmaan husi anin-boot no uma lima hetan estragus kauza husi inséndiu.
Enkuantu iha Venilale uma estragus kmaan hamutuk 23, uma sia hetan estragus natoon, uma rua afeta kauza hosi inundasaun inklui uma tolu mos hetan estragus tanba inséndiu.
“Tuir dadus ne’ebé rekolla fulan-jeneiru nian mak anin estraga kmaan 142, estragus natoon iha 65, aat totál iha tolu, depois ai-haan uma 27, uma neebe rai hodi halai tolu, inklui uma lisan hamutuk hitu ahi-han mutuk hotu iha postu Baguia no Quelicai,” Clementino Barbosa hateten.
Serbisu Munisipál Protesaun Sivíl Baucau apoia emerjénsia hanesan hahaan no ekipamentu dapur ba vítima dezastre naturál sira, enkuantu kona-ba materiál rekuperasaun enkamiña ona ba nasional hodi buka solusaun.
Clementino Barbosa husu ba komunidade atu labele halo uma iha mota-ninin no fatin ne’ebé fasil afeta inundasaun no husu atu komunidade sira labele tesi ai-horis arbiru, nunee bainhira akontese redus dezastre naturál.
Jornalista : Natalino Belo
Editór : Evaristo Soares Martins
