DILI, 01 marsu 2024 (TATOLI)—Husi janeiru to’o marsu ne’e, funsionáriu kontratadu Autoridade Nasionál Lisensa Ambientál Institutu Públiku (ANLA, I.P) hamutuk na’in 18 serbisu sein saláriu, Prezidente ANLA, I.P, António Lelo Taci, informa.
“Ami-nia funsionáriu iha ne’e hamutuk 29 husi ne’e 20 kontratadu maibé, na’in rua la kontinua tanba bazeia ba rezultadu avaliasaun entaun, agora hela 18 funsionáriu kontratadu mak husi janeiru mai to’o agora sira mai serbisu nafatin maske sira la iha saláriu,” Prezidente ANLA António Lelo Taci ba TATOLI iha nia kna’ar fatin, ohin.
Prezidente ne’e informa, iha 29 ne’e, iha ajente na’in haat husi ne’e na’in rua seluk asume hela kargu hanesan Diretór tanba liu selesaun tuir méritu hosi Komisaun Funsaun Públika (KFP) no permanente iha na’in lima.
“Funsionáriu kazuais 18 ne’e mak durante ne’e atende serbisu tékniku halo assessment (avaliasaun) ba proposta projetu, fiskalizasaun, monitorizasaun inklui emisaun Lisensa Ambientál tantu projetu públiku ka privadu,” nia relata.
Nia informa, kada loron ANLA simu pedidu proposta hosi proponente entre lima até projetu sanulu.
“Funsionáriu kontratadu sira ne’e mai nafatin serbisu tanba anteriór halo serbisu seidauk hotu entaun, sira tenke halo mezmu sira-nia kontratu seidauk hetan aprovasaun husi Vise-primeiru Ministru no Ministru Komérsiu Asuntu Ekonómiku no Ministru Turizmu no Ambiente”.
Hanesan ema tékniku, tuir Prezidente ANLA, I.P, sira nafatin kontribui no hein desizaun ne’ebé mak iha tanba serbisu sira ne’e serbisu tékniku nian la’ós administrasaun nian.
Nia esplika, kona-ba avaliasaun ba funsionáriu sira ANLA halo ona durante ne’e no hato’o ona pedidu ba Vise-primeiru Ministru no Ministru Komérsiu Asuntu Ekonómiku no Ministru Turizmu no Ambiente maibé seidauk resposta tanba sei la’o serbisu nian iha rai-li’ur.
Antes ne’e, Vise-primeiru Ministru no Ministru Koordenadór Asuntu Ekonómika no Ministru Turizmu Ambiente, Francisco Kalbuadi Lay, segunda ne’e, bolu ona instituisaun sira ne’ebé tutela hodi ko’alia kona-ba funsionáriu kontratadu sira ne’ebé kontratu ramata iha 31 dezembru atu avalia fila fali molok hala’o servisu.
“Ha’u halo reuniaun jerál ida hamutuk ho Empreza Públiku (EP) ho Instituisaun Públiku (IP) sira kona-ba funsionáriu kontratadu sira ne’ebé mak kontratu hotu iha 31 dezembru. Entaun, ida ne’e ha’u entrega ona ba kada IP no EP sira atu haree hanesan sira ne’ebé mak iha kapasidade no esperiénsia di’ak bele servisu nafatin, maibé ba sira ne’ebé mak servisu ladun di’ak bele tuir fali selesaun sira ne’ebé tuirmai,” Francisco Kalbuadi Lay dehan ba jornalista sira bainhira ramata enkontru ho dirijente sira iha nia Gabinete Farol, ohin.
Ministru Kalbuadi hateten, iha reuniaun ne’e mós sei haree ba prioridade servisu 2024 nian, tanba ne’e Governu seidauk halo mudansa ruma ba iha Instituisaun Públiku no Empreza Públiku sira.
“Ami seidauk iha buat ruma atu muda Empreza Públika ho Institutu Públiku sira, tanba ami la iha buat ruma atu muda, maibé nafatin hanesan uluk,” nia esplika.
Instituisaun ne’ebé mak tutela iha Ministru Koordenadór Asuntu Ekonómiku mak hanesan Autoridade Inspesaun no Fiskalizasaun Atividade Ekonómika Sanitária no Alimentár (AIFAESA), Servisu Rejistu no Verifikasaun Emprezariál, Institutu Públiku (SERVE, I.P), Institutu Nasionál Dezenvolvimentu de Mão- de- Obra (INDMO), Institutu Apoiu Dezenvolvimentu Emprezariál (IADE), Institutu Kualidade Timor Leste (IQTL), Autoridade Turizmu Timor-Leste (ATTL), Sentru Nasionál Formasaun Profisionál no Empregu Timor-Leste (CNFPE), Sentru Nasionál Formasaun Profisionál – Bekora (CNFP-Bekora), Inspesaun-Jerál Traballu (IGT), Sentru Konvensaun Dili (CCD), Institutu Peskiza, Dezenvolvimentu, Formasaun no Promosaun Bambu, I.P. (Institutu Bambu),
Tuirmai, Komisaun Nasionál ba Fasilitasaun Komérsiu (CONFAC), Ajénsia Promosaun ba Investimentu no Esportasaun Timor-Leste, I.P. (TradeInvest Timor-Leste, I.P.), GESPIN – Jestaun Parke Industriál, S.A., Sentru Lojístiku Nasionál (CLN), Sentru Turizmu no Informasaun Turístika, Sentru Restaurasaun/Food Courts, Pouzada, Autoridade Nasionál Lisensiamentu Ambientál, I.P. (ANLA), no Autoridade Nasionál Dezignada ba Kombate Alterasaun Klimátika, I.P. (AND).
Notísia relevante:Governu sei avalia funsionáriu kontratadu ne’ebé tutela iha MKAE
Jornalista: Felicidade Ximenes
Editór: Rafael Ximenes de A. Belo
