DILI,19 fevereiru 2024 (TATOLI)—Vise-primeiru Ministru no Ministru Koordenadór Asuntu Ekonómika no Ministru Turizmu Ambiente, Francisco Kalbuadi Lay, segunda ne’e, bolu ona instituisaun sira ne’ebé tutela hodi ko’alia kona-ba funsionáriu kontratadu sira ne’ebé kontratu ramata iha 31 dezembru atu avalia fila fali molok hala’o servisu.
“Ha’u halo reuniaun jerál ida hamutuk ho Empreza Públiku (EP) ho Instituisaun Públiku (IP) sira kona-ba funsionáriu kontratadu sira ne’ebé mak kontratu hotu iha 31 dezembru. Entaun, ida ne’e ha’u entrega ona ba kada IP no EP sira atu haree hanesan sira ne’ebé mak iha kapasidade no esperiénsia di’ak bele servisu nafatin, maibé ba sira ne’ebé mak servisu ladun di’ak bele tuir fali selesaun sira ne’ebé tuirmai,” Francisco Kalbuadi Lay dehan ba jornalista sira bainhira ramata enkontru ho dirijente sira iha nia Gabinete Farol, ohin.
Ministru Kalbuadi hateten, iha reuniaun ne’e mós sei haree ba prioridade servisu 2024 nian, tanba ne’e Governu seidauk halo mudansa ruma ba iha Instituisaun Públiku no Empreza Públiku sira.
“Ami seidauk iha buat ruma atu muda Empreza Públika ho Institutu Públiku sira, tanba ami la iha buat ruma atu muda, maibé nafatin hanesan uluk,” nia esplika.
Instituisaun ne’ebé mak tutela iha Ministru Koordenadór Asuntu Ekonómiku mak hanesan Autoridade Inspesaun no Fiskalizasaun Atividade Ekonómika Sanitária no Alimentár (AIFAESA), Servisu Rejistu no Verifikasaun Emprezariál, Institutu Públiku (SERVE, I.P), Institutu Nasionál Dezenvolvimentu de Mão- de- Obra (INDMO), Institutu Apoiu Dezenvolvimentu Emprezariál (IADE), Institutu Kualidade Timor Leste (IQTL), Autoridade Turizmu Timor-Leste (ATTL), Sentru Nasionál Formasaun Profisionál no Empregu Timor-Leste (CNFPE), Sentru Nasionál Formasaun Profisionál – Bekora (CNFP-Bekora), Inspesaun-Jerál Traballu (IGT), Sentru Konvensaun Dili (CCD), Institutu Peskiza, Dezenvolvimentu, Formasaun no Promosaun Bambu, I.P. (Institutu Bambu),
Tuirmai, Komisaun Nasionál ba Fasilitasaun Komérsiu (CONFAC), Ajénsia Promosaun ba Investimentu no Esportasaun Timor-Leste, I.P. (TradeInvest Timor-Leste, I.P.), GESPIN – Jestaun Parke Industriál, S.A., Sentru Lojístiku Nasionál (CLN), Sentru Turizmu no Informasaun Turístika, Sentru Restaurasaun/Food Courts, Pouzada, Autoridade Nasionál Lisensiamentu Ambientál, I.P. (ANLA), no Autoridade Nasionál Dezignada ba Kombate Alterasaun Klimátika, I.P. (AND).
Iha fatin hanesan, Inspetór Jerál Autoridade Inspesaun no Fiskalizasaun Atividade Ekonómika Sanitária no Alimentár (AIFAESA), Ernesto Monteiro, dehan, Ministru Koordenadór Asuntu Ekonómiku bolu lideransa sira husi Instituisaun Públiku no Empreza Públiku sira hodi hato’o preokupasaun sira hotu ne’ebé mak durante ne’e iha.
“Ami-nia preokupasaun mak antes ne’e ita-boot sira (Jornalista) hatene katak AIFAESA nia funsionáriu hamutuk 123; iha 96% funsionáriu kontratadu hamutuk 118 no daudaun ne’e hela de’it funsionáriu permanente na’in lima entaun ida ne’e labele hala’o kna’ar ho di’ak iha terrenu tanba ne’e mak ohin ha’u hato’o katak funsionamentu AIFAESA la la’o tanba funsionáriu sira ne’e kontratadu ne’ebé mak kontratu remata iha 31 dezembru,” Ernesto Monteiro haktuir.
Nia hatutan, ho preokupasaun sira ne’e depende ba orientasaun ministru nian atu bele responde ba nesesidade servisu AIFAESA nian.
“Ami sei planu atu hato’o proposta sira ne’e iha semana ne’e ba Ministru katak funsionáriu sira ne’e mai tomak fila fali, maibé depende mós ba Ministru nia desizaun ho nune’e funsionamentu ne’ebé mak durante la la’o bele la’o hikas fila fali hanesan tinan uluk liu ba,” nia konklui.
Jornalista: Felicidade Ximenes
Editór: Rafael Ximenes de A. Belo
