DILI, 05 marsu 2024 (TATOLI) – Sekretáriu Estadu Komunikasaun Sosiál (SEKOMS), Expedito Dias Ximenes vizita ba Televizaun Edukasaun Timor (TVE) hodi haree direita kondisaun servisu TVE nian.
“Ha’u mai iha ne’e atu haree kondisaun TVE liuliu kona-ba estudiu telivizaun nian durante ne’e iha, prezensa ha’u nian hanesan membru Governu ida ba situasaun ne’ebé mak TVE hasoru agora,” hatete Sekretáriu Estadu ne’e ba jornalista sira iha edifisiu TVE Comoro Dili, tersa ne’e.
Durante vizita ba estudiu TVE nia ko’alia ho na’in ba telivizaun no dirijente sira hotu kona-bá konstrusaun ne’ebé Governu halo liuliu estrada ne’ebé muda metru lubuk ida tama hodi hasai estudiu telivizaun nian.
“Estudiu TVE nian konstrusaun estrada ne’e tenke dudu sai, entaun ha’u ko’alia ho na’in ba TVE no dirijente sira, sira koopera tanba intrese ba ema hotu nian, Governu sei prepara fali kondisaun ba sira,” nia hatete.
Membru Governu ne’e hatutan, TVE presiza dezenvolve liutan tanba hosi TVE mak prodús rekursu ne’ebé mak media rua hanesan Radiu Telivizaun Timor-Leste Empreza Públika (RTTL,EP) no Grupu Media Nasionál (GMN) utiliza hela agora.
“TVE durante ne’e prodús ona ema kualidade barak, media sira balu utiliza hela rekursu TVE nian, Governu sei tau atensaun makas ba TVE. Entaun ha’u vizita ne’e atu hakbesik aan Governu ba sira. Sira nia estudiu mak laiha ona maibé kada loron sira nafatin prodús notisia ho estudiu ne’ebé simples, apresia ho sira tanba hasoru situasaun difisil maibé sira nafatin hala’o sira nia knar hanesan orgaun komunikasaun sosiál,” nia tenik.
SEKOMS kontinua servisu hamutuk hela ho TVE liuhosi programa Governu rona no haree rasik. Iha programa rua ne’e ida debate no ida programa dokumentáriu.
“Programa rua mak ita apoiu ba TVE no media konvensionál sira hotu,” nia katak.
Iha vizita ne’e SEKOMS mós hasoru malu ho estudante kolejiu São Miguel hodi ko’alia kona-ba programa Governu nian no enkoraja estudante sira atu estuda maka’as tanba futuru nasaun ne’e nian iha estudante foinsa’e sira nia liman.
Iha biban hanesan, Fundadór TVE, Armindo Caetano, hatete, sente orgullu tanba SEKOMS bele vizita TVE hodi haree direta kondisaun ne’ebé mak televizaun ne’e hasoru.
“Ha’u kontente tebes tanba membru Governu ida mai vizita hodi haree ami nia kondisaun. Ida ne’e hatudu sira nia sentimentu solidaridade nu’udar timoroan ba ami,” nia agradese.
Governu sei fó rai ba Eskola São Miguel
Entertantu, Fundadór Eskola Kolejiu São Miguel Arkanjo, Armindo Caetano, hatete, Governu konkorda atu fó rai ba sira atu harii fali eskola foun, maibé ho tipu arrendamentu.
“Rai ne’ebé Estadu atu fó mai ami ho tipu arrendamentu, ami sei aluga, ami mak halo kompensasaun ba ema sira hela iha rai, nune’e mak ami foin bele halo konstrusaun ba eskola foun fali, ami aluga ho presu ne’ebé ki’ik, seidauk hatene hira, rai ne’e iha ne’ebé ha’u labele ko’alia sai lai ba públiku,” hatete Armindo.
Nia dehan, kona-ba eskola sorin ne’ebé mak Governu sobu ona hodi loke luan estrada semana ne’e nia laran Governu sei transfere ona osan ba konta eskola nian.
“Eskola rohan ne’ebé Governu sobu semana ne’e osan sira transfere ona mai ami nia konta, Governu selu de’it ba eskola nia rohan ne’ebé mak sobu, sira la selu hotu. Governu selu osan hamutuk rihun $300-resin. Ami simu no koopera tanba Governu sei prepara kondisaun mai ami,” nia hatete.
Kona-ba rai Sekretariu Estadu Teras Propriedade (SETP) mak promete ona sei atribui iha tempu besik tanba parte rua iha ona konkordansia.
Rai rohan ne’ebé dadaun ne’e São Miguel utiliza hanesan rai estadu. Tanba ne’e bainhira rai ne’ebé Governu fó ba São Miguel harí ona Eskola foun rai rohan ne’e sei entrega hikas ba Estadu.
Maske nune’e, na’in ba São Miguel ne’e agradese ba Governu tanba buka ona solusaun hodi kria kondisaun ba eskola ne’e.
“Agradese ba Governu tanba promete atu kria kondisaun mai ami. Nu’udar timoroan ami prontu koopera atu nune’e halo dezenvolvimentu ba ita nia rai. Maske Governu ajuda ami hanesan na’in ha’u sei esforsu makas atu halo konstrusaun foun ba Eskola São Miguel atu labele depende de’it ba apoiu hosi Governu nian,” nia garante.
Notísia relevante: Indemnizasaun ba sobu Eskola São Miguel hamutuk rihun $324-resin
Jornalista: Hortencio Sanchez
Editór :Florencio Miranda Ximenes
