Indemnizasaun ba sobu Eskola São Miguel hamutuk rihun $324-resin
DILI, 06 fevereiru 2024 (TATOLI)—Ministru Obra Públiku (MOP), Samuel Marçal hateten, segunda (05 janeiru) horisehik, Governu liuhosi Sekretáriu Estadu Asuntu Toponímia no Organziasaun Urbana (SEATOU) ho ekipa Jestaun Merkadu Munisipál sobu Eskola São Miguel tanba Governu fó indeminizasaun hamutuk rihun $324-resin.
Notísia Relevante: Governu la konsistente ho konkordánsia muda Eskola São Miguel
Governante ne’e hateten, indemnizasaun refere vale ba ba rai metru ualu (8) nian ne’ebé konstrui eskola refere besik estrada públiku, nune’e tenke sobu.
Tanba, tuir nia, estrada refere presiza urjente atu konstrui tanba sei iha serimónia solene ida ne’ebé sei realiza iha fatin istóriku Tasi-Tolu.
“Ho ne’e agradese ba Sekretariadu Estadu Toponímia no Organziasaun Urbana (SEATOU), Germano Dias Santa Brites, halo negosiasaun no konsege halo akordu ida no sira konkorda mak sobu eskola ne’e. Sobu mós la’ós sobu hotu eskola ne’e maibé sobu de’it parte oin ne’e, tanba iha tempu badak ne’e sei realiza serimónia solene ida iha Tasi-Tolu,” Ministru Samuel hateten ba jornalista sira hafoin partisipa reuniaun Konsellu Ministru iha Palásiu Governu, tersa ne’e.
Tanba ne’e, nia dehan, Governu labele hein de’it maibé Governu hanoin pelumenus konstrusaun estrada ne’e bele konklui iha fulan lima nia laran ne’e.
Tuir nia, Governu halo negosiasaun ba-mai maibé Diretór Eskola São Miguel ne’e orsida konkorda no depois ordia fali la konkorda, entaun Governu entrega kompeténsia ba Sektretariadu Estadu Toponímia no Organziasaun Urbana (SEATOU) hodi haree ba kestaun ne’e.
“Ha’u apresia ho SEATOU tanba bele negósia no hetan akordu ho Diretór Eskola São Miguel ho nia advogadu. Horisehik sobu no ohin Diretór lori ona nia konta bankária. Ita halo preparasaun ne’e kle’ur loos ona tanba diretór ne’e ita haruka lori ida-ne’e mai, la lori mai, entaun ida-ne’e mak halo kle’ur,” nia hateten.
Notísia Relevante: Eskola São Miguel kontinua atividade aprendizajen hodi hein desizaun Governu
Jornalista : Osória Marques
Editór : Cancio Ximenes
