DILI, 05 marsu 2024 (TATOLI) – Prezidente Federasaun Taekwondo Timor-Leste (FTTL), Gabriel da Costa, informa,daudaun atleta Taekwondo na’in-rua preparadu atu arranka ba Xina hodi tuir kualifikasaun Olímpiku iha Paris 2024,semana oin.
“Atleta na’in-rua preparadu ona, sira sei arranka iha loron 10 marsu agora, atleta na’in rua ho treinadór ida,” Prezidente ne’e informa ba Agência TATOLI iha Jináziu Dili, tersa ne’e.
Atleta na’in-rua ne’e mak, Ana da Costa sei kompete iha kilograma 49 no Cerilio Lein sei kompete iha kilograma 58.
Durante viajen no jogu iha Xina ne’e responsabiliza hosi Governu liuhosi Ministériu Juventude Desportu, Arte no Kultura (MJDAK) tanba apoiu orsamentu hamutuk rihun $20.
“Osan ba jogu no viajen ba Xina apoiu hosi Governu. Ho osan montante ne’e ami sei jere halo didi’ak atu nune’e bele kobre to’o atividade ramata. Jogu kualifikasaun ne’e importante tebes, bainhira ita nia atleta ba joga mak hatudu pontu di’ak mak ita foin bele ba kompete iha Olimpiku Paris 2024, sé ita nia atleta na’in rua mak la hetan pontu di’ak mak Taekwondo sei la partisipa jogu ne’e,” nia tenik.
Notísia relevante: Taekwondo prepara atleta na’in-10 kompete iha jogu CPLP
Jornalista: Hortencio Sanchez
Editór : Florencio Miranda Ximenes
