iklan

INTERNASIONÁL, DESPORTU, DILI, HEADLINE

Taekwondo prepara atleta na’in-10 kompete iha jogu CPLP

Taekwondo prepara atleta na’in-10 kompete iha jogu CPLP

Membru Taekwondo Timor-Leste, hatudu atraksaun iha ambitu abertura kompetisaun Taekwondo ne'ebé realiza hosi Embasada Koroea iha Timor-Leste, iha GMT Dili, sábadu (17/06). Imajen Tatoli/Francisco Sony

DILI, 04 marsu 2024 (TATOLI) – Prezidente Federasaun Taekwondo Timor-Leste (FTTL), Gabriel da Costa, hateten, daudaun prepara hela atleta na’in-10 atu bá kompete iha jogu Komunidade Ko’alia Lian Portugés (CPLP-sigla Portugés) ne’ebé sei realiza tinan oin iha Timor-Leste.

“Jogu CPLP nian ne’e tanba ita mak uma na’in, nune’e ita prepara hela atleta na’in-10 mak sei kompete iha jogu ne’e, sira na’in 10 ne’e feto lima no mane lima, sira ne’e mesak junior hotu,” Gabriel hatete ba jornalista sira iha Jináziu Dili, segunda ne’e.

Fulan oin, nia informa FTTL sei realiza kampionatu nasionál foin mak iha desizaun atu hili atleta na’in-10 bá kompete iha jogu CPLP.

“Atleta ita tenke hili sira ne’ebé mak kualidade, fulan-oin ita sei realiza kampionatu nasionál ita haree atleta junior sira ne’ebé iha prestasaun di’ak mak sei kompete iha jogu CPLP nian,” hateten.

Governu liuhosi Ministériu Juventude no Desportu (MJDAK) aprova ona orsamentu hamutuk rihun $15 ba FTTL hodi realiza kampionatu nasionál.

Tuir kritéria ne’ebé iha jogu CPLP sei fó liu preoridade ba atleta hotu ne’ebé kompete ho idade juniór hosi tinan 16 mai kraik.

Rekorda fali katak, CPLP liuhosi konferénsia Ministériu Juventude no Desportu ba dala XIV, iha Luanda, hosi nasaun hamutuk sia aprova ho votu unaminidade ba proposta Timor-Leste  nian ne’ebé husu atu sai uma-nain ba jogu CPLP iha 2025.

Kandidatura Timor-Leste nian hodi sai uma-na’in ne’e aprezenta direta hosi Ministru Juventude, Desportu, Arte no Kultura (MJDAK, Nélio Isaac Sarmento, no hetan votu unamidade hosi nasaun membru sira hanesan Angola, Brazil, Cabo-Verde, Guinne-Bissau, Guinne Equtorial, Mosambique, São Tome e Principe no Portugal.

Hafoin deklara kandidatura, Diretor Nasional Desportu MJDAK, Cesarino da Silva halo kedan aprezentasaun ba preparasaun téknika Timor-Leste nian, iha ne’ebé jogu ne’e sei iha kompetisaun ba modalidade sia mak hanesan, Atletizmu, Basketból 3×3, Voleiból Praia, Tenis Kampu, Futeból, Taekwondo, Karate-do no Xadres, inklui mós iha Atletizmu Paralímpiku.

Jogu CPLP ne’e sei implementa iha loron 17-27 Jullu tinan 2025 ne’ebé sei kompete entre nasaun CPLP hotu.

Ho nune’e, Sekretáriu Estadu Juventude no Desportu Portugal, João Paulo Correia, iha konferénsia ne’e deklara katak Portugal sei fó apoia téknika ba Timor-Leste ba jogu desportiva ne’e.

Notisia relevante: SEJD transfere $19.000 ba FTTL realiza kampionatu nasionál

Jornalista   : Hortencio Sanchez

Editór           : Florencio Miranda Ximenes

iklan
iklan

Leave a Reply

iklan
error: Content is protected !!