CNC-FDCH selebra formalidade atribui bolsu estudu ba oan sira hosi sobrevivente

DILI, 06 marsu 2024 (TATOLI) – Diretór Ezekutivu, Centro Nacional Chega (CNC), Hugo Maria Fernandes, asina nota entendimentu hodi formaliza kooperasaun ho Fundu Dezenvolvimentu Kapitál Umanu (FDCH, sigla portugés) ba atribuisaun bolsu estudu ba oan sira hosi sobrevivente.
“Ohin, Centru Nacional Chega formaliza kooperasaun institusionál ho FDCH hodi fortalese servisu institusaun rua iha futuru relatviu ho kapasitasaun ba rekursu umanu, espesialmente atribuisaun bolsu estudu ba sobrevivente nian oan sira. Entaun ho akordu ida-ne’e ba tinan ne’e hosi Centro Chega ita prepara lista ba sobrevivente nia oan nain-15 mak sei sai benefisiáriu uluk ba bolsu estudu hosi FDCH nian”, Hugo Maria dehan ba jornalista sira hafoin selebrasaun akordu kooperasaun servisu ho FDCH ne’ebé halo iha Centro Chega iha Balide, kuarta ne’e.
Nia dehan, hosi benefisiáriu 15, ekipa tékika hosi Centro Nacional Chega no FDCH sei halo verifikasaun ba sira-nia dokumentu hodi haree katak sira-ne’e merese duni atu hetan bolsu estudu ka la’e, tanba iha akordu ne’e mós iha klauzula balun sita katak ekipa téknika hosi instituisaun rua ne’e tenke halo verifikasaun didiak molok atribui bolsu ba benefisiáriu hirak ne’e.
Benefisiariu 15 ne’ebé mak sei hetan bolsu estudu hosi FDCH sei halo estudu iha rai laran liuliu iha ensinu superiór sira ne’ebé akreditadu iha Timor-Leste.
Hugo afirma, CNC mós la taka matan ba timoroan sira ne’ebé mak hakarak aumenta sira-nia koñesimentu iha área hanesan istória, antropolójia, sosiolojia, arkivu no muzolojia, ho akordu kooperasaun ida-ne’e CNC sei fó oportunidade hodi fó biban ba timoroan sira atu bele aumenta koñesimentu iha área temátika sira-ne’e tanba ida-ne’e mós foku ida ba CNC.
Nia husu ba sobrevivente nia oan sira ne’ebé aban bain rua sai benefisiáriu ba bolsa hosi FDCH katak tenke hatudu seriedade ba estuda, atu bele sai ema ne’ebé aban bain rua hodi servi fali rai Timor-Leste.
Diretór Ezekutivu CNC rekorda katak CNC mós atribui ona bolsu estudu ba sobrevivente nia oan sira hamutuk 11 no orsamentu ne’e hosi CNC nian. benefisiariu hirak ne’e halo ona estudu iha Universidade Timor-Leste (UNTL) inklui ensinu superiór iha Dili laran, estuda iha área oioin no akaba ona estudu no balun sei semestre haat no lima.
“Sira-ne’e ami la husik, ami kontinua kontrola sira. Iha atividade ruma iha CNC ami envolve sira”, nia salienta.
Iha fatin hanesan, Diretór Ezekutivu FDCH, Julio Aparicio, hateten FDCH asina nota entendimentu hodi formaliza kooperasaun ho CNC ba atribuisaun bolsu ba sobrevivente nia oan ba tinan haat.
“FDCH hanesan institusaun Estadu iha obrigasaun halo akordu ho instituisaun Estadu ne’ebé de’it atu fó bolsu estudu ba timoroan ne’ebé priénse rekezitu hosi FDCH no liuhosi akordu ne’e ekipa instituisaun sei verifika molok atribui bolsu ba sobrevivente nia oan ba tinan haat”, nia dehan.
Nia husu ba timoroan sira ne’ebé mak hetan oportunidade ba bolsu hosi Governu hodi ba eskola iha rai laran no rai li’ur, tenke aproveita ho di’ak hodi tuir duni espetativa institusaun nia hakarak.
“Kuandu imi la aproveita di’ak ami sei hakotu bolsu estudu ne’ebé mak ami fó ba imi no haruka sira sei selu fali osan ne’ebé mak durante ami (FDCH) fó liuhosi bolsu estudu, tanba iha kontratu ba atribuisau bolsu ne’ebé ami selebra hosi institusaun mós sita ida-ne’e”, nia konklui.
Jornalista: Natalino Costa
Editór : Zezito Silva

