iklan

BOBONARO, HEADLINE, MUNISÍPIU, SEGURANSA

KRAM koordena ho PNTL Bobonaro kontrola arte-marsiál ne’ebé kontinua treina subar

KRAM koordena ho PNTL Bobonaro kontrola arte-marsiál ne’ebé kontinua treina subar

Komisaun Reguladora Arte-Marsiál (KRAM) ho estrutura Sub-KRAM munisípiu halo enkontru koordenasaun ho Komandu Polísia munisípiu Bobonaro. Imajen Tatoli/Sérgio da Cruz.

BOBONARO, 08 marsu 2024 (TATOLI)-Komisaun Reguladora Arte-Marsiál (KRAM), sesta ne’e halo enkontru koordenasaun servisu ho Polisía Nasionál Timor-Leste (PNTL) komandu munisípiu Bobonaro hodi haforsa liután kontrolu no vijilansia ba atividade ne’ebé Organizasaun Arte Marsiál sira kontinua halo ezersísiu subar.

Sekretaria Ezekutivu KRAM, Mateus Soares, esplika maske daudaun ne’e governu suspende hela atividade Organizasaun Arte-marsiál, maibé foin lalais ne’e iha suku Saburai, postu administrativu Maliana, organizasaun balun kontinua realiza atividade sa’e sintu ba membru sira.

Notísia relevante: PNTL Bobonaro suspende provizóriu atividade arte-marsiál

Nia esplika, bazea ba lei númeru 5/2017 ho rezolusaun ne’e fó kompeténsia ba KRAM no komandu PNTL atu halo kontrolu ba aktu ilísitu sira tanba durante ne’e  simu informasaun hosi dadus monitorizazaun kona-bá envolvimentu membru arte-marsiál iha aktu krime.

Maibé KRAM nia kompeténsia lato’o ne’ebá, tanba atu halo atuasaun ba aktu sira-ne’e só komandu PNTL ne’e mak bele halo.

“Tanba ne’e mak ohin ami mai halo enkontru koordenasaun, nune’e ba oin bele haree took ida-ne’e,” nia hateten iha salaun enkontru komandu PNTL munisípiu Bobonaro.

Nia hatutan, KRAM ho PNTL hala’o servisu ne’e ho objetivu atu eskuadra membru OAM ba desportu no respeita orden públika.

“Ita espera ho reuniaun sira-ne’e ita nafatin husu servisu PNTL ba oin ita rigór oituan atu halo organizasaun sira-nia atividade, pelumenus ho baze ba prestasaun desportu, labele ho baze ba movimentu krime, ida-ne’e Estadu bandu no lei bandu,” Mateus hateten.

Adjuntu Komandante PNTL munisípiu Bobonaro, Asistente Superintendente Joel Casimero de Carvalho, prontu ezekuta lei no orden hodi garante situasaun hakmatek ba povu no nasaun.

Nia informa, dezde governu hasai rezolusaun hodi suspende atividade arte-marsiá to’o agora konflitu iha Bobonaro boot liu sei laiha.

Nia dehan, ba oin sei rekolla hotu númeru kontaktu koordenadór arte marsiál sira.

“Ita identifika, karik sira-nia membru balun ne’ebé envbolve iha krime, sira apoia Polísia lori kedas sira-nia ema ne’e mai iha komandu, depois ami mós kalan-kalan halo patrullamentu la’o-ain ba mai,” nia katak.

Kona-ba informasaun organizasaun balun realiza atividade sa’e sintu iha Saburai, Segundu Komandante Bobonaro simu duni informasaun maibé ekipa la konsge halo intervensaun, tanba kestaun distánsia nune’e to’o tarde.

“Ita espera ba oin ita-nia joven sira-ne’ebé envolve iha grupu arte-marsiál labele prátika tan atividade sira-ne’ebé ke agora governu bandu hela ne’e,” nia tenik.

Tuir rezultadu re-fiskalizasaun ne’ebé KRAM halo dentru loron 90, identifika fatin formasaun ka runting grupu arte-marsiál iha munisípiu Bobonaro hamutuk 45, kompostu hosi Persaudaraan Setia Hati Terrate ( PSHT) hamutuk 19, Kmanek Oan Rai Klaran (KORK) 14 no Ikatan Kera Sakti (IKS) 19, númeru ne’e mai hosi suku 23.

Notísia relevante: PAM Bobonaro husu KRAM servisu ho neutru

Jornalista: Sergio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!