PAM Bobonaro husu KRAM servisu ho neutru
BOBONARO, 08 marsu 2024 (TATOLI)-Komisaun Reguladora Arte-Marsiál (KRAM), sesta ne’e halo enkontru koordenasaun dahuluk ho Prezidente Autoridade Munisipál Bobonaro, Alexandrino Pires no husu servisu hp neutru.
Sorumutu ne’e realiza ho objetivu KRAM nasionál no sub-KRAM atu aprezenta relatóriu ba atividade re-fiskalizasaun fatin formasaun organizasaun arte-marsiál nian, koordenasaun servisu no husu apoia hosi PAM Bobonaro atu fó espasu ba Sub-KRAM munisípiu Bobonaro atu halo servisu.
Prezidente Autoridade Munisipál Bobonaro, Alexandrino Pires, husu KRAM atu servisu ho neutru iha kualkér atividade ne’ebé hala’o iha terrenu, nune’e bele apoia servisu Polisía Nasionál Timor-Leste hodi kombate krime.
Notísia relevante: Sub-KRAM Bobonaro desimina lei 05/2017 ba Arte-Marsiál
“Ha’u hakarak KRAM ne’e neutrál, se ita hakarak kombate krime, labele faru imi tau KRAM, maibé klamar iha-ne’ebá hotu, labele sai fali mestre, ema halo problema imi telefone ba dehan maun alin imi sees ona ema tún ba atu kaer imi, ne’e imposivel PNTL atu rezolve problema. Sé imi ba hanesan servidór estadu la haree maun ho alin, ita bele rezolve problema,” nia katak iha salaun enkontru autoridade munisípiu Bobonaro
Lider másimu iha munisípiu Bobonaro ne’e rekomenda ba KRAM atu masimiza atividade formasaun ka edukasaun sívika ba membru OAM sira nune’e bele regula sira-nia karáter atu krumpri lei no doutrina arte-marsiál.
“Ha’u hanoin ida-ne’e neneik neneik lori sira ba ona natureza umanu nian ona, sira bele kompriende, atu disiplina no respeita ema, se lae ferik-katuas sira-nia kios sira halo rahun hotu, buka ema la hetan, karau sira-ne’e tá mate hotu,” PAM Bobonaro fó hanoin.
Nia argumenta, bainhira membru OAM sira kontinua halo problema, ba oin sei estraga estabilidade nasaun.
“Imi kria konflitu, ikus mai inan-aman ferik ho katuas sira mak sai vítima, tanba imi halo problema duni malu to’o sunu uma. Ida-ne’e durante ha’u-nia mandatu, ha’u lakohi rona, hau gosta envolve ba grupu atu halo edukasaun ba imi-nia mentalidade, la’ós edukasaun atu sai premaniumu no kriminozu,” nia hateten.
Prezidente Autoridade mos promete sei involve KRAM no PNTL iha atividade vizita suku hodi fó hanoin joven no membru OAM sira atu koñese ba lei no regulamentu sira hodi kontribui ba pás no establidade.
Biban ne’e, Sekretáriu Ezekutivu KRAM, Mateus Soares, agradese no prontu koopera ho PAM munisípiu Bobonaro atu halo formasaun ba membru Organizasaun Arte Marsiál sira iha suku.
“Ami-nia papél promove no dezenvolve arte-marsiál sai modalidade desportu, ita espera ba oin servisu KRAM ho Prezidente Autoridade mais efetivu liu, hodi ajuda dezenvolve Organizasaun Arte-Marsiál sira-ne’ebé publiku haree hanesan grupu ida-ne’ebé diskriminadu iha sosiedade, maibé ita hakarak orienta fali, polítika re-integrasaun OAM ba sosiedade ho baze ba desportu no enkuadra sira ba modalidade ho alta kompetisaun,” nia dehan.
Enkuantu tuir rezultadu re-fiskalizasaun ne’ebé KRAM halo dentru loron 90, identifika fatin formasaun iha munisípiu Bobonaro hamutuk 45, kompostu hosi Persaudaraan Setia Hati Terate (PSHT) hamutuk 19, Kmanek Oan Rai Klaran (KORK) 14 no Ikatan Kera Sakti (IKS) 19, númeru ne’e mai hosi suku 23.
Notísia relevante: KRAM sensibiliza rejime jurídiku prátika arte-marsiál no rituál bá estudante DMCL Maliana
Jornalista: Sérgio da Cruz
Editór: Evaristo Soares Martins
