DILI, 12 marsu 2024 (TATOLI) – Vise Primeiru Ministru, Ministru Koordenadór Assuntu Sosiál no Ministru Dezenvolvimentu Rurál no Habitasaun Komunitária, Mariano ASSANAMI Sabino, tersa ne’e, realiza enkontru ho Prezidente Autoridade Munisípiu Lautém, Mélio de Jesus, hodi diskute asuntu dezenvolvimentu munisípiu Lautém nian.
Iha enkontru ne’e, Prezidente Munisípiu Lautem, Sr. Melio de Jesus, relata informasaun balun relasiona ho Programa Dezenvolvimentu Rural no Habitasaun Komunitária ne’ebé atu implementa iha Lautem.
“Hasoru malu ho Vise Primeiru Ministru atu aprezenta pontu importante balun hanesan, oinsá atu identifika potensialidade hanesan agrikultura, fatin turizmu no apoia hodi koordena ho rekursu umanu potensiál sira atu fila ba munisípiu hodi dezenvolve”, PAM Lautém ne’e hateten ba Jornalista sira iha iha Palásiu Governu-Dili.
Prezidente Autoridade Munisipál ne’e mós informa ba Vise PM atu buka dalan identifika no konvense rekursu umanu potensiál sira husi Lautém bele fila hodi kontribui ba dezenvolvimentu Lautém ba oin.
Husu mós ba Vise Primeiru Ministru bele ko’alia ho Ministériu relevante sira hodi halais dezenvolve infrastrutura báziku, hanesan estrada ligasaun Lautém ba Lospalos tanba kondisaun aat loos.
“Estrada ne’e aat tinan barak ona, nu’udar Autoridade koordena nafatin ho Governu sentrál nune’e bele buka solusaun lalais,” nia konklui.
Estrada ligasaun Lautem ba Lospalos ho nia kilometru hamutuk 40. Maibe kona-ba atu halo reabilitasaun seidauk hatene tanba desizaun hotu sei liu hosi Konsellu Administrasaun Fundu Infrastrutura (KAFI).
Orsamentu Jerál Estadu (0JE) 2024, Governu aloka ba Munisípiu Lautém hamutuk $7.628.912. hosi orsamentu ne’e ba programa hamutuk 13 mak hanesan, programa estrada no ponte hamutuk 261.105, programa dezenvolvimentu rurál no urbanu hamutuk $1.929.079, programa seguransa nasionál $29.636, programa asesu ba justisa $34.223, funsionamentu instituisionál programa $2.163.115.
Nune’e ba programa edukasaun pre-eskolár hamutuk $269.582, programa ensinu báziku $1.716.839, programa ensinu rekorrente hamutuk $2.448, programa kuidadu saúde primária $203.569, programa água saneamentu $209.370, programa inkluzaun sosiál $161.913, programa turizmu $41.149, programa aumentu sustentável produtividade no produsaun $595.884.
Notísia relevante:PAM Lautém hasoru MPIE ko’alia prosesu konstrusaun Estrada ligasaun Lautém-Lospalos
Jornalista: Hortencio Sanchez
Editór: Florencio Miranda Ximenes
