MAPPF sei halo manutensaun bá tratór ne’ebé avaria iha Bobonaro
BOBONARO, 13 marsu 2024 (TATOLI)-Ministériu Agrikultura, Pekuária, Peska no Floresta (MAPPF) hateten iha tempu badak ekipa tékniku sei halo manutensaun ba tratór hirak-ne’ebé avaria iha munisípiu Bobonaro.
Ministru Marcos, hateten tratór iha munisípiu Bobonaro kuaze unidade 30, hosi númeru ne’e balu sei ativu hela operasaun no barak mak avaria totál.
Notísia relevante: Tratór foun unidade 25 sei tulun agrikultór sira hasa’e produsaun agríkola
“Ita-nia ekipa sei mai atu hadi’a hotu, ita iha tratór foun, sei sosa tán,” Marcos ko’alia iha serimónia lansamentu kompetisaun Agrikultura 2024, iha sede suku Raifun, tersa ne’e.
Ba kestaun ne’e, Xefe suku Ritabou, Maximiano dos Santos Araújo, hateten governu presiza rezolve ho lalais, tanba problema tratór difikulta tebes agrikultór sira halai natar.
Nia haktuir, kada tinan Ritabou hetan de’it apoiu Tratór boot ne’e ida de’it, entaun lable halo operasaun ba natar iha suku tomak.
“Ha’u hanoin labele, tanba ne’e maka barak ne’e mak na’in fila rai ho tratór aluga, ne’e ita espera Ministeriu Agrikultura iha hanoin atu halo manutensaun ba tratór sira ne’e,” nia hateten.
Iha fatin ketak, Xefe suku Manapa, postu Administrativu Cailaco, Zeferino Loco Bere, hateten durante ne’e agrikultór sira preukupa tebes kona-bá problema refere, tanba kada tinan Diresaun Servisu Munisipál Agrikultura, munisípiu Bobonaro apoia de’it tratór médiu unidade ida mak halo operasaun kobre natar sira iha Cailaco.
“Ita haree tratór ida de’it ne’e la sufisinete atu apoia agrikultór sira halo natar, entaun tempu udan balun aluga de’it tratór ki’ik hosi maluk sira-ne’ebé iha. Ha’u hanoin iha Cailaco ne’e presiza aumenta ba 10 nune’e bele responde ezijénsia agrikultór sira tanba natar iha Cailaco ne’e luan,” nia dehan.
Notísia relevante: MAPPF loke ona prosesu halo manutensaun tratór boot
Jornalista: Sergio da Cruz
Editór: Evaristo Soares Martins
