DILI, 14 marsu 2024 (TATOLI) – Primeiru-Ministru, Kay Rala Xanana Gusmão, hatete Governu kontinua halo preparasaun hodi simu vizita Amu Papa Francisco, ne’ebé mai iha fulan-agusto tinan ida ne’e.
“Preparasaun ita nian kontinua la’o maka’as hela. Vizita ne’e akontese iha tinan ida ne’e, ita la tau osan entaun ami aprova rezolusaun ida liu hosi fundu kontijénsia hamutuk millaun $12 atu tau ba preparasaun hodi simu ita nia Amu Papa,” PM Xanana hatete ba jornalista sira iha Palásiu Prezidensiál Dili, kinta ne’e.
Notísia relevante:Marco Sprizzi elojia preparasaun Estadu kona-ba Papa Francisco vizita TL
Xefe Governu dehan tanba tempu sei naruk Governu hamutuk ho Igreja halo hela preparasaun ne’ebé neneik, maibé ho kualidade ne’ebé di’ak tanba Amu Papa ho idade ne’ebé avansadu ona presiza halo preparasaun ne’ebé di’ak.
“Ha’u labele dehan preparasaun to’o ona iha ne’ebé tanba vizita ne’e la’ós aban, la’ós fulan oin, sei do’ok uitoan maibé preparasaun ami halo hela. HorIseik iha Konsellu Ministru ami ko’alia maka’as kona-ba ida ne’e,” afirma lider Ezekutivu ne’e.
Atu halo preparasaun ne’ebé di’ak, nune’e fulan-jullu ekipa tékniku hosi Vatikanu sei mai tan Timor-Leste hodi haree kondisaun no preparasaun ne’ebé daudaun ne’e Timor-Leste halo hela.
“Osan ne’ebé ami aprova bo’ot ne’e la’os atu aloka estraga, ita tenke halo preparasaun ida di’ak, tanba Amu Papa katuas ona. Jullu ekipa ida sei mai fali haree kona-ba ita nia preparasaun, ita tenke halo preparasaun ne’ebé másimu bainhira Amu Papa sai ona hosi ne’e ba to’o Roma Vatikanu, ita foin sente di’ak tanba buat hotu kama’an ona ba ita. Durante iha ne’e karreta ne’ebé Papa sa’e mós la’os kareta baibain, atu tun hosi aviaun mós la’os tun hosi eskada baibain, Papa atu sai ba Tasi-Tolu ne’e ekipa hosi Vatikanu mak halo dezeñu,” nia katak.
Antes ne’e, Governu nomea ona Ministru Prezidénsia Konsellu Ministru, Agio Pereira, nu’udar Koordenadór Jeral ba vizita Santo Padre , enkuantu Ministru Administrasaun Estatál, Tomás do Rosário Cabral nu’udar Vise Koordenadór.
Governu simu ona vizita delegasaun hosi Vatikanu hodi koordena didi’ak kondisaun nesesariu sira.
Alende nee Koordenadór Jerál hamutuk ho ekipa daudaun halo ona preparasaun hamutuk ho delegasaun vatikanu loron hirak liubá hodi haree fatin hotu-hotu ne’ebé Santu Padre sei vizita no realiza eventu.
Notísia relevante:Tinan ne’e, Papa Francisco konfirmadu vizita Timor-Leste
Jornalista: Hortencio Sanchez
Editór : Florencio Miranda Ximenes
