DILI, 14 marsu 2024 (TATOLI)– Ministru Juventude Desportu Arte no Kultura (MJDAK), Nelyo Isaac Sarmento, relata, kampu multifunsaun ne’ebé kompostu hosi dormitóriu ba jogadór sira ne’ebé konstrui hosi Korea International Cooperation Agency (KOICA) finaliza ona, nune’e parte Governu hahú foti ona nia responsabilidade hodi finaliza kampu ne’e.
“Kampu ne’e tarde uitoan tanba hosi parte ita nian ka Governu nian tanba projetu kooperasaun ne’e katak sira (KOICA) finansia ita-mós finansia, KOICA nian hotu ona, agora parte balun Governu nian mak seidauk hanesan ita mak responsabiliza ba moru protesaun no dreinajen. Nune’e, ita nia parte tarde tanba ita sei halo dezeñu no foin mak finaliza,” Ministru Nelyo hatete ba Agência TATOLI iha Palásiu Governu, kuarta ne’e.
MJDAK submete ona dezeñu moru protesaun no bee-dalan ba Konsellu Konsellu Administrasaun Fundu Infraestrutura (KAFI) no Agência Nasionál Dezenvolvimentu (ADN) hodi verifika, nune’e tempu besik bele loke ba konkursu públiku.
“Bainhira ita loke ona tenderizasaun kompañia sira aplika mak manán halo ona servisu mak kompaña hosi KOICA nian bele halo fali servisu hanesan nahe du’ut sintetu ne’e, agora sira seidauk nahe tanba ita seidauk rezolve bee-dalan no moru protesaun hosi parte oeste nian,” Governante ne’e afirma.
Tuir akordu ne’ebé KOICA halo ho Governu Timor-Leste katak konstrui kampu hamutuk haat iha kapitál Dili mak hanesan, kampu multifunsaun Becora, Kampu Comoro, Kampu Bintang Bidau no Kampu Kampung Alor.
Progresu konstrusaun ba kampu hirak ne’e mak hanesan Becora atinje ona 50%, Comoro 81,56%, Kampung Alor 92,81 no Bidau 85,91%.
Kampu haat ne’e halo tanba hetan ajudu finanseiru hosi Governu Korea Súl liuhosi sira nia Ajénsia KOICA iha Timor-Leste ho montante millaun $2,4-resin ne’ebé konstrui hosi kompaña timoroan CHLN Timor Unipesoal Lda.
Konstrusaun ba kampu haat ne’e, Governu no KOICA lansa fatuk dahuluk iha 07 outubru tinan 2022 liubá.
Notísia relevante:KOICA sei entrega kampu multifunsaun haat ba Governu iha agostu
Jornalista: Hortencio Sanchez
Editór : Florencio Miranda Ximenes
