DILI, 16 marsu 2024 (TATOLI)—Komandante Tránzitu Seguransa Rodaviária Nasionál halo ona pedidu ba Komadante Jerál (KonJer) Polísia Nasionál Timor-Leste (PNTL) atu halo manutensaun ba motorizada batedores haat ne’ebé oras ne’e daudaun avaria.
“Ha’u halo ona pedidu ba Komandante Jerál Polísia Nasionál Timor-Leste, husu atu halo manutensaun ba motorizada batedores haat tanba nia mákina avaria, atu nune’e bele ajuda Polísia Tránzitu sira halo serbisu, liu-liu fó seguransa ba alta entidade sira ne’ebé halo vizita serbisu mai Timor-Leste,” Xefe Departementu Trázitu no Seguransa Rodaviária Nasionál, Asistente Superintendente Luís da Costa, hateten iha ninia knaar fatin, Kuartél Jerál, sábadu ne’e.
Motór batedores haat ne’ebé a’at, molok ne’e halo akizisaun iha Japaun, iha V Governu Konstitusionál nia tempu ho objetivu atu fó seguransa ba vizita antigu Prezidente Repúblika Indonézia, Susilo Bambang Yudoyono, maibé iha loron 04 abríl 2021 kauza hosi inundasaun boot iha Dili, bee hoban motór hirak ne’e to’o bee tama ba motór nia mákina sira no ikus mai labele halo ona operasaun.
Notísia relevante : Membru F-FDTL nain-15 finaliza formasaun seguransa ba alta entidade
Nia dehan, ekipa tékniku ofisina sira hato’o ona katak istimasaun osan ba manutensaun motór batedores ida ne’e barak, tanba ne’e Departementu Tránzitu labele rezolve, tanba tinan ne’e osan ba manutensaun motorizada la sufisiente.
“Nune’e mak ami hato’o ona preukupasaun ba iha Komandu Jerál PNTL atu rezolve kestaun ida ne’e, atu nune’e motór batedores haat ne’e bele funsiona filafali hodi Tránzitu nasionál uza halo fali serbisu,” nia informa.
Iha biban ne’e, Asistente Superintendente Luís da Costa, agradese ba Governu Repúblika Xina liuhosi nia reprezentante, tanba foin daudaun apoia ona Tránzitu Seguransa Rodaviária Nasionál, motorizada batedores lima hodi halo serbisu.
“Motorizada batedores lima ho kapasidade boot bele fasilita serbisu Tránzitu Seguransa Rodaviária Nasionál atu halo serbisu hodi fó seguransa ba alta entidade sira bainhira mai halo vizita mai ita-nia rai,” nia tenik.
Jornalista : Natalino Costa
Editora : Julia Chatarina
