Tribunál aplika TIR ba arguidu na’in-tolu ameasa SEATOU

DILI, 19 marsu 2024 (TATOLI) – Tribunál Judisiál Primeira Instánsia Dili (TJPID), iha tersa (19/3), ohin, halo interogatóriu dahuluk ba arguidu na’in-tolu ne’ebé ameasa Sekretáriu Estadu Asuntu Topónomia no Organanizasaun Urbana (SEATOU), Germano Dias Santa Brites, bainhira halo intervensaun iha jogu Bola Guling iha área Kampung Alor, Suku Kampung Alor, Postu Administrativu Dom Aleixo no Munisípiu Dili, iha sabadu (16/3) foin lalais ne’e.
Iha prosesu interogatóriu dahuluk ba arguidu ho inisiál AP, AC no AN, Ministériu Públiku reprezenta hosi Prokuradór Renato Berenahan promove arguido hirak ne’e ho krime obstrusaun autoridade públiku, artigu 251 hosi Kódigu Penál Timor-Leste.
Iha alegasaun, Prokuradór Renato Berenahan husu ba Tribunál atu aplika medida koasaun Aprezentasaun Periódika (AP) ba arguidu sira atu aprezenta aan fulan ida dala ida iha Eskudra Polísia ne’ebé besik.
Maibé iha prosesu interogatóriu, Defeza hosi arguidu na’in-tolu Defensór Públika José Maria da Costa Guteres husu ba Tribunál atu aplika medida koasaun Termu Identidade Rezidénsia (TIR,) tanba nia kliente hirak ne’e faktu la aprovadu katak arguidu sira komete krime obstrusaun autoridade ne’ebé Ministériu Públiku promove ba sira.
Hafoin Tribunál rona tiha parte hotu, Tribunál liuhosi Juiz ne’ebé prezide Primeira Interogatóriu ba arguidu na’in-tolu, Juiza Julmiati Freita aplika TIR ba arguidu nain tolu.
Hafoin remata interogatóriu, Defensór Públika José Maria da Costa Guteres, dehan katak simu desizaun hosi Tribunál liuliu ba medida koasaun ne’ebé mak Tribunál aplika ba kliente sira.
Nia haktuir, Sekretáriu Estadu Asuntu Topónomia no Organizasaun Urbana ho intensaun ba jogu Bola Guling iha área Aitarak-Laran hodi husu ba arguidu atu aprezenta dokumentu kona-ba lisensa atividade nian no arguidu fó sai lisensa to’o 24 maiu 2024.
Nia hatutan katak faktu la aprovadu katak momentu ne’e arguidu na’in-tolu mak hakilar hasoru Sekretáriu Estadu Topónomia durante nia intervensaun iha jogu bola guling tanba momentu ne’e ema barak mak hakilar la’os arguidu sira de’it.
“Iha desizaun ne’e, Tribunál aplika medida koasaun TIR ba arguidu na’in-tolu ne’e. Tanba la iha indísiu forte, tanba sá arguidu sira la halo duni obstrusun ba autoridade, tanba iha ema barak mak hakilar, la’os arguidu na’in-tolu mak hakilar, tanba ne’e mak la iha prova katak sira mak halo”, Defeza hosi arguidu sira Defensór Públika Jose Maria hateten ba jornalista sira iha TJPID, tersa ne’e.
José Guterres hateten, kliente sira mós prontu koopera ho parte justisa bainhira karik ba Ministériu Públiku kontinua loke investisaun ba kazu ne’e.
“Sira mós hateten katak prontu nafatin kolabora ho justisa, bainhira Ministériu Públiku kontinua inisia investiga kazu ne’e ba oin liuliu presiza evidénsia ruma, entaun arguidu na’in-tolu prontu atu fó sira-nia deklarasaun”, nia konklui.
Notísia relevante : PNTL detein suspeitu na’in-tolu tanba ameasa membru Governu
Jornalista: Natalino Costa
Editór : Zezito Silva

