DILI, 20 marsu 2024 (TATOLI)– Diretór Kompetisaun no Futeból Profisional iha Federasaun Futeból Timor-Leste (FFTL), Frederico Martins, informa, halo ona preparasaun, nune’e iha fulan-Maiu realiza kopa FFTL, hodi akomula klube hamutuk 17, ne’ebé hamahan aan iha Liga Futeból Timor-Leste (LFTL) mak partisipa.
“Iha loron 02 maiu, ita hahú ona kopa FFTL, ne’e meiu ida atu hamoris nafatin jogadór sira nia talentu,” tenik Frederico ba Agência TATOLI via Whatsapp, kuarta ne’e.
Nia dehan, rejistrasaun ba klube hahú 20 marsu to’o 05 abríl. Rejistu jogadór no ofisiál hahú 25 marsu to’o 18 abríl. Dada rifa atu buka hatene kona-bá klube sira monu iha grupu saida hahú 27 abríl. Jogu sei realiza iha Estádiu Munisipál Dili no árbitru sei lidera hosi, árbitru lokál ne’ebé iha.
Klube 17 ne’ebé atu kompete iha kopa ne’e kompostu hosi klube primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Atletico Ultramar, Academica FC no Porto Taibessi FC.
Enkuantu, klube Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC no Zebra FC.
Iha jogu ne’e FFTL prepara ona prémiu ba manán na’in sira primeiru lugar sei hetan osan $15.000, segundu lugar $10.000, terseiru lugar $7.500 no kuartu lugar $5.000.
Notísia relevante:Laiha liga futeból afeta ba talentu jogadór timoroan
Jornalista: Hortencio Sanchez
Editór : Florencio Miranda Ximenes
