DILI, 01 abríl 2024 (TATOLI) – Portavós Komandu Jerál PNTL Superintendente Polísia António da Luz, dehan selebarasaun páskua iha territóriu nasionál la’o hakmatek no laiha pertubasaun ruma.
“Durante selebrasaun semana santa, hahú hosi kinta-feira santa, sesta feira santa, sábadu aleluia no domingu páskua, laiha insidente no asidente gravé ne’ebé mak mosu iha munisípiu sira inklui Dili. Tuir relatóriu ne’ebé ha’u hetan hosi kada Komandante PNTL munisípiu durante selebrasaun páskua tinan ne’e, ita la rejista kazu insidente bo’ot signifika selebrasaun páskua tinan ne’e la’o iha situasaun hakmatek”, Superintendente Polísia António da Luz hateten ba jornalista sira iha Komandu Jerál PNTL, Segunda, ohin.
Komandante ne’e louva maturidade povu Timor-Leste tanba bele koopera ho autoridade seguransa hodi kontribui ba pás no estabilidade.
“Husu komunidade sira atu kontinua nafatin kontribui pás no estabilidade iha ita-nia rai, ida-ne’e, kuandu rona buat ruma, favór pasa informasaun ba polísia hodi nune’e polísia bele halo atuasaun imediatu”, nia fó-hanoin.
Iha fatin hanesan, Komandante PNTL Munisípiu Liquiça, Superintendente Polisia, Paulino Carmo Pereira, hateten situasaun seguransa iha munisípiu Liquiça la’o kontroladu durante selabrasaun páskua.
“Durante selebrasaun páskua ho situasaun seguransa iha Liquiça 100% la’o di’ak, sarani sira ba tuir misa ho di’ak. Durante selebrasaun páskua ita la rejista kazu grave ruma, só ita iha de’it kazu suspeitu sira ne’ebé tama loja xineza ida iha Liquiça hodi tama iha loja laran, foti sasan sira iha loja laran ne’e. ida-ne’e mak ita rejista”, nia dehan.
Jornalista: Natalino Costa
Editór : Zezito Silva
