Governu presiza apoia ekipamentu agrikultura iha komunidade Fatulia
BAUCAU, 04 abríl 2024 (TATOLI) – Autoridade suku Fatulia, postu administrativu Venilale, munisípiu Baucau, husu apoia ba governu atu ajuda ekipamentu ba agrikultór sira.
Xefe Suku Fatulia, Angelino Moises Pereira, esplika, apoia ne’ebé husu mak ekipamentu hanesan tratór nune’e parte autoridade hamutuk ho komunidade finaliza proposta no entrega ona ba Ministériu Agrikultura, Pekuaria, Peska no Florestra tanba maioria komunidade moris ho vida agrikultór maibé sei menus ekipamentu.
Notísia relevante: Suku Fatulia falta bee-moos no estrada a’at
“Proposta ne’ebé hato’o ba Ministériu Agrikultura mak husu apoia tratór, mákina sama hare ou rontok nian,” Xefe Suku Fatulia hateten iha Bahadato, kinta ne’e.
Razaun husu apoia tanba komunidade iha suku referidu maioria halo to’os no natar maibé sei utiliza ekipamentu manuál ka sistema tradisionál nune’e difikulta ba prosesu kuda no kolleta ne’ebé fó impaktu ba rendimentu no menus produsaun.
Proposta ne’ebé hato’o mak husu apoia ekipamentu ba agrikultór hamutuk unidade ualu kompostu mákina tratór haat no mákina sama hare haat.
“Bainhira apoia, ita sei fornese kada aldeia mákina ida, maibé xefe aldeia mak sei halo jestaun ba ida-nee, tanba agrikultór sira badinas servisu, entaun ita halo proposta hodi fasilita no hafasil sira hodi servisu,” Angelino Perreira akresenta.
Ministru Agrikultura, Pekuária, Peska no Florestra (MAPPF), Marcos da Cruz, kompromete iha posibilidade atu hatan proposta ne’ebé hato’o hosi komunidade iha Fatulia liuhosi autoridade suku tanba suku referidu nu’udar área potensiál ba setór agrikultura liuliu produtu lokál hanesan hare.
“Ita sei lori mai fasilita komunidade agrikultór iha Fatulia,” Marcos da Cruz promete.
Suku Fatulia iha aldeia haat komposta hosi Bahadato, Osso-uaque, Uai-to-Bono no Uatulia-ana ho totál populasaun 2.721 ne’ebé iha totál natar hamutuk ektare 800-resin, utiliza ba kuda hare no ai-han seluk tuir tempu.
Notísia relevante: Governu inaugura irrigasaun iha Fatulia
Jornalista : Natalino Belo
Editór : Evaristo Soares Martins
