BAUCAU, 08 abríl 2024 (TATOLI) – Komandu Polísia Nasionál Timor-Leste munisípiu Baucau liuhosi seksaun tránzitu rejista kazu asidente trafégu hamutuk haat iha inísiu fulan-abríl ne’e.
Komandante Tránzitu PNTL Munisípiu Baucau, Asistente Inspetór Alfredo Therik, esplika, hosi númeru asidente referidu, kompostu hosi kmaan no todan ne’ebé iha ona prosesu investigasaun.
“Asidente kmaan rua no grave rua, kazu haat ne’e daudaun iha prosesu nia laran,” Komandante Tránzitu PNTL Munisípiu Baucau hateten iha Vila Nova, segunda ne’e.
Kazu asidente grave akontese iha loron-05 abríl akontese xoke malu entre karreta baskolante xapa-matríkula 53-572 ho karreta fuzo iha área Bahamori, suku Gariuai ne’ebé rezulta kundutór JC tohar iha ain parte loos.
Enkuantu kazu seluk, asidente singulár ne’ebé akontese iha loron-07 abríl bainhira vítima inisiál SMS uza motorizada vario xapa-matríkula 9075 diresaun Baucau ba Dili maibé to’o iha área Kaikua, postu Vemasse monu no lakon vida tanba pankada iha hirus matan.
Hafoin akontesementu parte Polísia to’o kedas fatin hodi evakua vítima sira ba fasilidade saúde ne’ebé hodi halo tratamentu maibe vítima SMS lakon vida tanba pankada hirus matan ba sinál tránzitu iha estrada Kaikua, Vemasse.
“Vítima pankada maka’as, ita evakua kedas ba Klínika Vemasse, maibé la konsege salva tanba raan sai maka’as,” Asistente Inspetór Alfredo Therik akresenta.
Asidente rua kmaan akontese iha Suku Uailili motorista xoke ema la’o ain no ida seluk iha área Vila Nova Baucau xeke malu entre motorizada.
Tránzitu PNTL Munisípiu Baucau, husu komunidade sira hotu, bainhira konduz motorizada no karreta tenke halai neineik inklui kumpri regra sinál tránzitu nune’e evita asidente.
Jornalista : Natalino Belo
Editór : Evaristo Soares Martins
