Selebra Idul Fitri, Xefe Estadu saúda komunidade musulmanu iha Timor-Leste

DILI, 10 abríl 2024 (TATOLI)– Xefe Estadu Timor-Leste, José Ramos Horta, saúda kompatriota musulmanu hotu iha Timor-Leste no iha mundu tomak, ne’ebé ohin selebra loron Idul Fitri hamutuk, hafoin tuir faze Ramadhan ho ritual jejun durante fulan ida.

“Maun-alin no inan-feton Musulmanu sira iha Timor-Leste, hodi Povu Timor-Leste nia naran, ha’u hato’o ha’u-nia votus ba imi hotu iha okaziaun ksolok Idul Fitri nian, ne’ebé marka ikus husi fulan santo Ramadan nian,” Xefe Estadu hato’o nia mensajen liuhosi pájina ofisiál ne’ebé Agência TATOLI asesu, kuarta ne’e.

Prezidente Repúblika dehan Idul Fitri mak selebrasaun viajen espirituál nian, momentu ida atu haksolok ho família no belun sira, hodi fó perdua ba sala sira iha tempu uluk, no renova lasu unidade, pás, no laran-sadi’a iha fuan Islamíku nian.

“Iha Timor-Leste, ita orgullu ho ita-nia diversidade relijioza no armonia. Komunidade Musulmanu nu’udar parte integradu husi kultura sira ne’ebé halo ita-nia nasaun hanoin kle’an ho hanoin sira ne’ebé ita tau aas nu’udar nasaun,” nia tenik.

Komuniade Musulmanu iha nasaun ne’e marka ona okaziaun nakonu ho bensaun ida ne’e ho orasaun, reuniaun no festividade sira espesiál.

“Ha’u dezeju katak ida-ne’e sei lori ksolok, pás no bénsaun ba imi no ema ne’ebé imi hadomi,” dezeju Horta.

Perdua no hadomi malu 

Entretantu, Amir Musulmanu iha munisípiu Viqueque, Venancio Oliveira, esplika selebrasaun loron Idul Fitri  ba musulmanu sira hodia hamoos sala ne’ebé durante ne’e halo liuliu kasu tiha sala atu kria fali pás no domin.

“Loron Idul Fitri sai hanesan loron ida durante fulan ida ami halo jejun hodi hadi’a ami-nia aan no husu perdaun ba Subahanahu Wa Ta’ala ba ami-nia sala sira-ne’ebé ami halo durante ne’e”,  Venancio Oliveiro, hateten ba jornalista sira iha Mesjid suku Matahoi-Uatulari.

Selebrasaun loron Idul Fitri mak musulmanu sira bolu Allah dala tolu no halo interpretasaun katak Allah  maka boot liu ba buat hotu-hotu. Signifika musulmanu sira manán ona  sala sira ne’ebé halo iha  tinan ida nian laran ne’e  no moos  ona no agora ba oin moris foun fali ona.

Nune’e nia husu ba maluk musulmanu sira  liuliu iha munisípiu Viqueque, inklu Timor laran tomak katak ba oin   hadi’a nafatin aan no la’o tuir ain fatin Allah nian dalan.

“Atu nune’e ita moris to’o rohan la’ek no mate karik ho kontente.  Husu ba joven musulmanu sira atu kria unidade no pás inklui  fó toleránsia ba malu tanba islamÍku  hanorin ninia  musulmanu sira  halo buat ne’ebé  di’ak ba ema hotu no haree ema seluk  hanesan ho  ita-nia aan rasik”, nia apela.

Tuir dadús musulmanu iha munisípiu Viqueque na’in-600 resin  maka partisipa iha selebrasaun loron idult fitri.

Iha fatin hanesan, Reprezenta komunidade musulmanu iha postu Uatulari, Alberto Pinto, haktuir, selebrasaun ida-ne’e sai importante ba mulsumanu hodi hamoos sala no sei hadame malu ho relijiaun sira hanesan Katóliku, Prostestante no rejiaun sira seluk ne’ebé eziste iha Timor Leste.

“Moris iha mudu ida-ne’e tenke haree malu ho di’ak, kria dame no pás ba malu. Keta ami halo sala ruma, ba oin loron ne’e ami so’e ona ba kotu no ba oin ami sei halo buat ne’ebé di’ak ho abitante sira seluk hodi kontribui ba pás no estabilidade”,  nia hato’o.

Notísia relevante: Selebra loron Idul Fitri, komunidade Musulmana Timor-Leste hakarak hametin pás

Jornalista : Hortencio Sanchez/Vitorino Lopes da Costa

Editór         : Florencio Miranda Ximenes