VIQUEQUE, 16 abríl 2024 (TATOLI)—Floresta munisípiu Viqeque konsege rekolla reseita hamutuk $6.600 ba kofre Estadu durante fulan-tolu, hahú janeiru to’o marsu tinan ne’e.
“Ami hahú husi trimestre dahuluk tinan 2024 rekolla taxa husi ai-komersiál ne’ebé maka ita-nia komersiante sira tesi no selu kada kúbiku, nune’e taxa ne’ebé ami rekolla hamutuk $6.600,” Xefe Departamentu Reflorestasaun, Territoriál Floresta no Planta Industriál munisípiu Viqueque, José da Silva, informa ba Agência Tatoli iha ninia knaar fatin, Beloi, tersa ne’e.
Daudaun ne’e ai ho espésie rua hanesan ai-teka no ai-gemelina (ai-teka Filipina) iha ona lisensa komersiál. Nune’e, bainhira komersiante sira tesi ai-teka lokál selu kada kúbiku ho kustu $25, enkuantu ai-gemelina kada kúbiku $15.
“Kona-ba prosesu selu tenke ba nasionál, ami fasilita dokumentu, depois selu tiha ami sei akompaña verifikasaun ba ai sira-ne’ebé maka kormersiante sira atu tesi,” nia akresenta.
Notísia relevante : Floresta Covalima rejista emprezáriu 29 investe iha atividade karpintaria
Tuir dadus, reseita husi fulan-tolu ne’e komersiante munisípiu Viqueque tesi ai ho tipu ai-teka hamutuk 1.237 m3 ho taxa $5.925 no ai-gemelina 2,27 m3 ho taxa $675.
Guarda Florestál hamutuk na’in-21 no tékniku na’in-haat, daudaun ne’e kontinua halo serbisu kontrolu ai hodi asegura ema tesi ai ilegál sira iha munisípiu Viqueque.
Maski nune’e, Guarda Florestál hasoru dezafiu oinoin durante halo serbisu, hanesan menus kolaborasaun husi autoridade no entidade sira no menus transporte hodi halo kontrolu ba ema tesi ai ilegál, maibé ekipa responsável sempre iha kompromisu no vontade hodi hala’o knaar.
“Ita-nia autoridade no abitante sira tenke kolabora ho Guarda Floresta atu asegura ema tesi ai ilegál, maibé durante ne’e ami haree kolabora ladún di’ak ho ami. Transporte ba Guarda Floresta daudaun ne’e uza motorizada unidade haat hodi halo serbisu. Ha’u sente transporte sai mós preokupasaun ba ami. Nune’e, ha’u hato’o beibeik ona ba nasionál maibé to’o agora seidauk fó resposta, liuliu transporte,” nia tenik.
Jornalista : Vitorino Lopes da Costa
Editora : Julia Chatarina
