iklan

MUNISÍPIU

Masakre Liquiça (II): “Milísia sira tiru ha’u, uza kilat rakitan”

Masakre Liquiça (II): “Milísia sira tiru ha’u, uza kilat rakitan”

Sobrevivente Masakre Liquiça, Carla Serão ho nia maun. Imajen/espesiál

LIQUIÇA, 16 abríl 2024 (TATOLI) – “Milísia sira tiru kona ha’u-nia ibun. Raan sai maka’as. Sira uza kilat rakitan mak tiru, bainhira ha’u subar iha Pe. Rafael nia karreta okos, tanba situasaun manas sente la seguru ona ha’u halai sai mak milísia sira hetan ha’u tiru, maibé sira la konsege kaer ha’u tanba ha’u halai liu”

Memória pasada ida-ne’e, Sobrevivente (sasin matan ka sasin moris) Masakre igreja São João de Brito Liquiça, Carla Nunes haktuir ba jornalista Agência TATOLI Hortêncio Sanchez liuhusi dadalia ne’ebé hala’o iha Salaun Tokodede Centre Liquiça (05 abríl 2024), foin lalais ne’e.

Bainhira ami tama iha igreja hanoin fatin ne’e sagradu inimigu sei la mai book ami, sira sei la mai estraga ami, sira sei la mai oho ami iha fatin ne’e.

Maibé to’o ikus akontese buat oinseluk la hanesan ho ami-nia hanoin. Iha loron ne’e, 06 abríl 1999 milísia sira tama okupa hotu rezidénsia amu sira-nian, igreja sira nakonu.

Sira mai bobar hena mean iha sira-nia ulun. Sira-nia oin mean. Matan laran sira ne’e mean hotu. Ami haree ami ta’uk no ami reza iha fatin de’it. Ami la hatene saida mak sira halo ba ami.

Ema barak hakilar ami laiha sala, ami sala laiha, maibé milísia sira hatan, “Ami halo imi tetuk iha fatin ne’e”. Ami fuan ta’uk haree sira komesa oho ona mane sira. Sira komesa halo violénsia seksuál ba feto sira ho obrigatóriu.

Ami ta’uk no halai sai maibé fatin hotu ema taka-metin. Iha tempu ne’ebá, ha’u ho idade ne’ebé ki’ik; tinan 17. Iha dadeer ami haree milísia nia boot Eurico Guterres mak tama ba ko’alia ho amu sira, ami la hatene sira ko’alia saida.

Bainhira Eurico sira sai, sira lansa tiru kedan. Rona kilat tarutu, ha’u halai buka fatin atu subar.

Fatin laiha tanba ema nakonu hotu, entaun ha’u hateke ba Amu Rafael nia karreta leet hela, ha’u halai de’it ba amu nia karreta okos hodi dolar tama ba toba iha okos. Ami na’in tolu mak tama iha karreta okos ne’e; ha’u-nia subriñu ida naran Paulino no primu ida-tan ha’u ladun koñese ami mak subar iha karreta okos.

Ami haree moos loos. Milísia sira oho ema barak ona, raan fakar halo ami mós oin halai uitoan. Milísia sira la hetan ami tanba ami toba iha karreta okos.

Kada minutu ami sente la seguru tanba ema movimentu ba mai barak, ha’u-nia fuan la hakmatek. Ami na’in tolu deside sai maibé la hatene ida-idak halai ninian.

Bainhira ha’u halai sai, to’o iha eskada huun igreja nian milísia sira hetan ha’u, tanba ha’u halai sira hakilar: “Tiru nia! Oho nia! Kaer nia!”. Entaun sira uza kilat rakitan ne’e tiru ha’u, kona los ha’u-nia ibun. Raan sai barak. Entaun, ha’u konsege halai sai hodi subar iha li’ur.

Maibé ha’u la hatene iha tempu ne’ebá ema ruma hasai ha’u-nia foto. Entaun iha ne’ebá, ha’u mak tuur hela ho ha’u-nia maun ne’e. Nia kanek maka’as no ha’u, iha ha’u-nia ibun.

Iha tempu ne’ebá, ha’u-nia apa enfremeiru entaun lori kedan ha’u ba ospitál hodi suku ha’u-nia ibun ne’e. Entaun, ami tenke muda fali ba subar iha Dili maibé lalais de’it tenke fila fali mai Liquiça.

Ami uluk ema milísia sira atu oho iha foho Garianan. Entaun, ami ne’e sai target (alvu) ba milísia sira buka tuir ami. Entaun, ami halai ba mai de’it to’o funu ramata.

Ha’u haree de’it akontesimentu ne’e halo ha’u ta’uk no trauma to’o agora. Agora mak rona kilat tarutu ona ne’e sente ta’uk los, hanoin fali buat sira uluk nian ne’e. 

Kontribuisaun ba dezenvolvimentu

Tebes, ita-nia luta ne’e la’ós fasíl mak manán, maibé liuhusi sofrimentu lubuk ida ne’ebé sosa ho fakar raan, ne’ebé ha’u rasik haree ho matan liuhusi Masakre Liquiça ne’e.

Agora ita ukun rasik aan ona, ha’u hakarak moris livre no hakmatek, halo de’it serbisu ba hadi’a moris no kontribui ba nasaun nia di’ak, saida mak Estadu orienta tuir de’it atu nune’e dezenvolve ita-nia nasaun ne’e.

Husu ba maluk hotu liuliu Sobrevivente sira, uluk ita terus, ita fakar raan, balun mate, hela ita balu mak sei moris, ita sente ona prosesu ba ukun rasik aan ne’e la’ós fasíl, entaun ita hotu hamriik hamutuk fó liman ba malu kontribui ba nasaun nia di’ak. 

Rekomendasaun ba Estadu

Buat hotu ne’ebé Estadu haruka ami halo, ami prontu halo kontribui ba nasaun nia di’ak. Maibé, ami husu ba Estadu durante tinan-25 ona ami seidauk hetan rekoñesimentu husi Estadu.

Entaun Governu ida-ne’e hanoin netik ami ba! Rekoñese netik ba ami-nia sakrifisiu ne’ebé durante ne’e halo iha tempu susar.

Ami la husu buat barak, maluk balun alejadu, balun moras mentál tanba konsekuénsia moruk sira ita liu ne’e. Se bele Estadu tau netik atensaun ba sira, kria kondisaun di’ak ba sira atu nune’e sira bele goza netik ukun aan ida ne’e molok sira mate.

Rekomendasaun ba joven

Husu ba joven sira liuliu Munisípiu Liquiça, tenke kria pás iha ita-nia Munisípiu. Ita hatene rai ida ne’e sosa ho raan no ruin ne’ebé naklekar mak hetan liberdade ida ne’e.

Nu’udar joven, tenke hanoin dook ona ba nasaun ne’e nia di’ak, tenke estuda maka’as, kakutak kriativu halo buat ne’ebé fó benefísiu ba sosiedade. Ida ne’e mak kontribuisaun ita-nian ba dezenvolvimentu.

Ita hatene katak nasaun ne’e futuru iha imi joven nia liman. Se imi lakohi aproveita, imi mak lakon imi-nia futuru, tanba Governu kria oportunidade barak; eskola gratuita, formasaun oioin, tenke aproveita oportunidade hirak ne’e!

Hakribi ona violénsia tanba violénsia agora laiha ona valór tanba situasaun agora la hanesan uluk. Uluk luta ba ukun aan, maibé agora luta ba dezenvolvimentu, atu buka hadi’a ita idaidak nia moris.

Joven sira, goza demokrasia ne’e ho lolos, tuir nia dalan, tanba loron aban hein hela imi-nia prejensa, la’ós imi se tan, se la prepara agora bainhira.

Kronolojia Masakre Liquiça 

Entretantu, Masakre Liquiça nia kronolojia, tuir Relatóriu Sentru Nasionál Chega! (CNC-sigla portugés) ne’ebé Agência TATOLI asesu, konfirma: 

Tuku 06:00 dadeer

Iha loron 06 Abríl 1999, Membru Grupu Milisi Besi Merah Putih (BMP) hahú lansa provokasaun no terrór hasoru populasaun sira ne’ebé evakua hela iha rezidénsia Padre Rafael dos Santos nian. 

Tuku 08:30 dadeer

Membru Grupu Milísia Besi Merah Putih sira tuda fatuk ba populasaun sira ne’ebé evakua iha rezidénsia Padre sira-nian no halo kanek ema na’in rua. Asaun ne’e kontinua to’o tuku 11:00 dadeer.

 Tuku 09:00 dadeer

Iha tuku 09:00 dadeer, Líder Grupu Milísia Pro-Integrasaun Eurico Guterres ho nia elementu sira ba Eskritóriu Igreja Liquiça atu ko’alia ho Padre Rafael no Padre José. Bainhira Eurico Guterres ho nia elementu sira hasoru malu ho Padre Rafael dos Santos no Padre José, Eurico Guterres hateten ba Padre Rafael no Padre José katak, sira hakarak kria diálogu ida entre Padre sira ho Administradór (Bupati Liquiça) iha momentu ne’ebá Leoneto Martins no mós Líder Grupu Milísia Besi Berah Putih nian Manuel Sousa. Eurico Guterres mak sai hanesan mediadór hodi buka dalan atu populasaun sia ne’ebé evakua iha rezidénsia Padre sira-nia bele fila fali ba sira-nia uma ho seguru.

Maibé Sr. Leonito Martins no Sr. Manuel Sousa lakohi halo diálogu tanba sira na’in rua emosionál tebes.

 Tuku 11:00 dadeer

Realiza sorumutu ida iha Kodim Liquiça molok halo atake ba igreja no rezidénsia padre sira-nian. Sorumutu ne’e partisipa hosi autoridade sivíl no militár ne’ebé importante iha Liquiça no balun husi Dili (kapitál provinsia). Líder sira ne’e mak inklui Komandante Korem (Danrem) ba Timor-Leste Koronél Mudjiono; Komandante Kopassus Forsa Espesiál Tribuana VIII Tenente Koronél Yayat Sudrajat; komandante Kodim Liquiça (Dandim) Tenente Koronél Asep Kuswadi; Administradór Liquiça (Bupati) Leonito Martins no Xefe Polísia Munisípiu Tenente Koronél Adios Salova. 

Tuku 12:30 lorokraik

Sorumutu ne’ebé realiza iha Kodim Liquiça ramata no iha tempu hanesan komioneta (truk) 4 ne’ebé nakonu ho polísia husi Brigada mobile nian para besik iha Igreja Liquiça nia oin.

Militár Indonézia mós mai hotu maibé kolokadu de’it iha edifísiu KODIM nian, ne’ebé nia distánsia ladook husi Igreja Liquiça. Enkuantu, membru polísia regulár sira mós lokaliza iha fatin ne’ebá. 

Tuku 01:00 – 04:00 lorokraik

Kilat komesa lian besik área igreja Liquiça nian. Grupu Milísia Besi Merah Putih (BMP) hamutuk ho Militár husi KODIM Liquiça, Koramil Maubara, membru KOPASSUS Satgas Tribuana VIII, Membru Batallaun 143 no membru BRIMOB husi Dili ne’ebé uza hotu máskra (Topeng) hodi taka sira-nia oin, komesa halo atake ba populasaun ne’ebé evakua iha Igreja laran.  Momentu ne’ebá Membru Polísia na’in rua hakbesik aan ba Igreja Liquiça, no husu ba Padre Rafael dos Santos atu entrega ema na’in rua ne’ebé evakua hotu iha fatin ne’e.

Ema na’in rua ne’ebé koñesidu nu’udar Líder Pro-Independénsia nian ne’e mak hanesan Jacinto da Costa Pereira (Xefe Suku Dato iha momentu ne’ebá) ho tan mane ida seluk, maibé Padre Rafael rejeita atu entrega ema na’in rua ne’e.

Hafoin ida ne’e, membru husi Brimob tiru kedas kilat ba leten nu’udár sinál ida ba grupu Milísia Besi Merah Putih (BMP) atu tama ba área Igreja Liquiça nian no tiru mós gás lakrimojéneo (gas air mata) ba rezidénsia padre sira-nian.

Membru milísia sira komesa halo ataka ba populasaun sira ho baliu, tudik, surik, bomba, kilat no sasan kro’at seluk. Atake ne’e obriga populasaun sira balun halai sai husi área igreja nian hodi salva sira-nia aan.

Sira ne’ebé halai sai husi área igreja nian mós kontinua hetan atake brutál husi membru milísia no Militár Indonézia sira ne’ebé hein hela iha li’ur.

Iha akontesimentu ne’e, milísia sira buka tuir mak mane no joven sira hodi oho, enkuantu feto no labarik sira husik de’it. Iha mós populasaun balun mak halai ba Administradór Munisípiu (Bupati Liquiça) Sr. Leonito Martins nia uma, maibé elementu Militár Indonézia no milísia balun kontinua duni tuir hodi oho no halo tortura ba sira, no oho mós ema balun iha Sr. Leonito Martins nia uma. Akontesimentu ne’ebé kruél tebes ne’e la’o kuaze durante oras tolu nia laran.

Tuku 06:00 lorokraik

Kamioneta Hino Militár Indonézia nian hamutuk unidade neen ba iha Igreja Liquiça hodi tula mate isin sira iha igreja laran hodi lori ba fatin ne’ebé to’o agora seidauk identifika.

Númeru populasaun ne’ebé mate iha Masakre Liquiça

Akontesimentu iha Igreja Liquiça sai hanesan masakre boot ida iha Timor-Leste, maske nune’e to’o agora seidauk hatene loloos populasaun na’in hirak mak mate iha akontesimentu ne’e, tanba momentu ne’ebá Militár Indonézia no milísia husi BMP tula sai hotu mate isin hodi lori ba soe iha fatin ne’ebé konsidera segredu no ema lahatene.

Maibé númeru ne’ebé sasin sira informa liuhusi Relatóriu Chega! katak, ema ne’ebé mate iha masakre Liquiça maizumenus na’in 60 to’o 100. Iha mós sasin seluk ne’ebé hateten katak ema ne’ebé mai iha masakre ne’e kuaze ema na’in 200.

Kompozisaun Grupu/Unidade husi Autoridade Seguransa Indonézia nian ne’ebe Halo Atake ba Igreja Liquiça.

Grupu ka unidade sira husi parte seguransa Indonézia ne’ebé envolve iha Masakre Liquiça mak hanesan: Grupu Milísia Besi Merah Putih (BMP), Militár husi KODIM (Komando Distrik Militer) Liquiça, Koramil (Komando Rayon Militer) Maubara, Membru KOPASSUS (Komando Pasukan Khusus) Satgas Tribuana VIII, Membru Militár Batallaun 143 no BRIMOB (Bigade Mobile) Pelutaun ida husi Dili, no mós Membru Polisia Regulár POLRES (Polisi Resort) Liquiça kuaze na’in 15.

Sasin sira ne’ebé rekolla husi CNC

Sasin Padre Rafael dos Santos, (Bibi-atan husi Parokia Liquiça), fó nia testamuña hodi hateten katak:

“Ha’u rona tiru husi grupu Besih Merah Putih (BMP) no Brimob husi Parókia nia oin. Sira halo tiru ba leten. Liu tiha ne’e, membru sira husi Besih Merah Putih no Kodim tama hodi serku komunidade sira ne’ebé hela iha ambiente Igreja nia laran. Sira hahú tiru ba ema hotu no atake ema ne’ebé sira hasoru iha resintu Parokia nian”. 

Membru milísia akompaña husi Tropas KODIM nian no membru sira husi BRIMOB. Sira tama iha igreja laran hodi komesa oho populasaun sira ho surik no tiru ema sira ne’ebé sei hela iha igreja laran. Iha momentu ne’ebá sei iha feto no labarik sira iha igreja laran, no sira ne’ebé halo atake komesa oho joven no mane sira tanba sira mak besik liu odamatan, enkuantu feto no labarik sira iha sira-nia kotuk. Ha’u hare’e Membru Brimob sira harahun janela Parokia nian no soe gás lakrimojéneo (Gas Air Mata) dala barak ba uma-laran to’o populasaun sira ne’ebé iha laran labele loke sira-nia matan tanba efeitu husi gás lakrimojéneo (Gas Air Mata).

Efeitu husi gás lakrimojéneo (Gas Air Mata) ne’e fó biban di’ak liu bá milísia sira tanba fasíl atu oho populasaun sira ne’ebé matan labele nakloke ona atu haree. Iha tempu ne’ebé hanesan, Militár sira ne’ebé uza roupa sivíl ajuda milísia sira hodi kontinua tiru populasaun sira ne’ebé lakonsege tama ba rezidénsia padre nian tanba nakonu ona. Atake kruél (Mengerikan) ne’e kontinua to’o tuku 5:30.

Sasin ida husi testamuña na’in-16 ne’ebé subar iha igreja laran bainhira akontese masakre (Nia lakohi fó nia identidade) hateten katak: “Sira tiru populasaun sira hanesan tiru animál sira. To’o populasaun sira hit liman ona atu rende mós sira sei tiru no taa nafatin. Ami hateke no tanis de’it husi igreja laran. Atake ne’e halo husi Milísia Besi Merah putih, Tropa Regulár sira, Polísia no Brimob”.

Sasin Francisco de Jesus da Costa, (Sobrevivente Masakre loron-6 Abríl 1999).

Hamutuk ho populasaun balun ha’u subar aan iha sala han-fatin padre sira-nian durante asasinatu iha li’ur, maizumenus tuku 5 lorokra’ik. Ha’u tenke sai mai atu salva ha’u-nia aan. Bainhira ha’u sai mai, membru milísia baku ha’u ho ai-kabelak no sona ha’u-nia ulun-fatuk.

Tuirmai, ha’u foin konsiente katak kanek neen iha ha’u-nia ulun fatuk. Ha’u sorte boot tanba bele sees husi mate, tanba ha’u-nia belun ida ne’ebé mós hanesan polísia iha momentu ne’ebá mai salva kedas ha’u.

Bainhira ha’u sai ba iha li’ur, ha’u haree mate isin barak mak latan hela iha rai; labarik sira, feto sira, joven no katuas. Ha’u la’o de’it iha nia le’et.

Ha’u estima kuaze mate isin na’in-200 ne’ebé latan hela iha momentu ne’ebá.  Polísia ne’ebé salva ha’u lori ha’u ba sa’e karreta husi Polísia BRIMOB no lori ha’u ba Administradór (Bupati Liquiça) nia uma hamutuk ho ema na’in-30 resin ne’ebé mós hetan kanek todan liu.

Ami simu tratamentu saúde urgente husi enfermeira ida iha Administradór (Bupati Liquiça) nia uma. Depois Sr. Administradór obriga ami atu tenke hili opsaun Autonomia iha loron eleisaun no mós husu ami atu harii bandeira Merah Putih iha uma oin.

Notísia relevante:Masakre Liquiça (I): “Ha’u-nia kakorok hetan taa, milísia tenta halo mate ha’u”

Jornalista: Hortencio Sanchez

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!