DILI, 16 abril 2014 (TATOLI)–Asosiasi Lembaga Misionaris Awam (ALMA) daudaun ne’e fó tratamentu ka terapia ba labarik ho problema austismu ahmutuk 30-resin hahú husi janeiru 2024.
Madre Sebastian da Cruz, hateten sira fó tratamentu terapia rutina ba labarik sira sira 30-resin, no na’in tolu mak bele frekuenta ona eskola iha ensinu báziku.
Kona-ba autismo ka transtorno do espectro autista (TEA) ne’e problema ida liga ho dezenvolvimentu neurolójiku ne’ebé prejudika ba organizasaun hanoin, sentimentu no emosaun. Ida karateriza iha difikuldade komunikasaun, tanba falta dominiu linguajén no uza imajinasaun no mós difikuladade iha sosializasaun no komportamentu limitadu no repetitivu.
“Ita buka atu manán sira-nia konsentrasaun, tanba autismu ne’e iha rua, pasivu no ativu, tanba sira lahatene ezemplu hatais sapatu, terapia ba sira mak ne’e, sira hamutuk 30 resin,” madre Sebastian da Cruz, esplika ba TATOLI, iha konventu Alma Praia dos Qoqeiros Dili.
Atu kuidadu labarik sira ne’e ho di’ak maka, família ka ema ne’ebé akompaña labarik ho problema autismu ne’e tenke iha pasiensia barak, tanba labarik sira presiza tratamentu no apoiu espesiál, terapia importante liu atu bele tulun labarik sira ho difikuldade ba atensaun, hiperatividade no autismu.
Tuir Madre katak hosi maioria labraik sira ne’e iha hiperatividade no defisit ba atensaun ne’ebé bele lori tempu naruk. “Ema sira ne’ebé hanesan ne’e dífisil atu kontrola, difisil serbisu ho sira iha sala de aula. Ita presiza akalma sira atu hahú terapia no hatene kondisaun kada labarik sira-nian,” nia hatutan.
Nia dehan, falta rekursu hanesan profesór maka difikulta kongresaun ALMA ne’e hodi fó atendimentu espesiál ba labarik sira.
Jornalista: Jesuína Xavier
Editor: Agapito dos Santos
