DILI, 09 maiu 2024 (TATOLI) – Ekipa Hera FC suseu iha nia jornada hodi manán nia adversariu Laloran Wekeke FC ho golu mihis ka liu de’it ida ( 2-1) iha jogu kontinuasaun kopa Maun Boot Kay Ralala Xanana Gusmão ne’ebé realiza iha Estádiu Munisipál Dili, kinta ne’e.
Bainhira jogu la’o ekipa rua halo kedan kontra no atake ba malu tuir tékniku jogu futeból nian. Jogadór sira pinta bola ba mai haleu kampo laran, alende ne’e jogadór sira mós utiliza jogu ho estratejia nune’e bele halo golu lais liu.
Iha jogu ne’e Laloran domina uluk bola maibé la konsege prodús golu tanba falla iha estratejia husi lina klaran ne’ebé laiha jogadór mediu ne’ebé bele suplay bola ba avansadu. Husi fallansau ne’e Hera United utiliza kedan espasu ne’e hodi lansa kontra no atake ne’ebé makas halo jogadór Laloran dada iis la hetan.
Husi esforsu ne’ebé Hera halo fó duni rezultadu signifikativu tanba iha minutu 8, jogadór Miguel da Silva (7), lansa ona golu primeiru hodi hatur rezultadu ba 1-0. Maske golu ona Laloran la nonok, responde kedan ho atake ne’ebé seriu maibé seidauk kona iha tarjetu tanba jogadór hera halo blokeia makas iha lina defeza no sutu balu avansadu Laloran halo seidauk kona iha albu no sutu balu salva husi Guarda Rede.
Biar nune’e, Laloran la lakon esperansa kontinua esforsu no esforsu hirak ne’e la sai de’it esforsu tanba iha minutu 14 jogadór Gaudencio Monteiro (14) responde kedan golu ida hodi hatur rezultadu sai empata 1-1.
Rezultadu golu kontinua metin iha fatin tanba jogadór husi ekipa rua lansa kontra no atake maibé hela de’it hanesan esforsu tanba la rezulta golu ruma to’o minutu primeira parte termina.
Hakur ba segunda parte ekipa rua kontinua hamoris hikas kontra no atake halo jogu sai manas liutan. Adeptus atus ba atus husi ekipa rua nahe aan iha tribun leten hakilar ho lian makas hodi fó suporta másimu ba sira nia ekipa favoritu, adeptus balu tur ho nonok hodi akompña jogu ho kalma atu hein se los mak manán.
Husi suporta adesptus sira nian fó kontente tebes ba armada Hera United hodi hala’o jogu ne’ebé bonitu nune’e iha minutu 46 jogadór Abilio Jerónimo (20) konsege lees rede Laloran hodi nakfilak rezultadu ba 2-1.
Golu ne’e halo vontade jogadór Laloran nian komesa tun hodi la seriu halo jogu, maibé halo fali jogu ho defensivu la ansi halo golu bainhira seidauk iha oportunidade. Maibé Hera United la importa nafatin halo kontra no atake ne’ebé makas atu aumenta golu maibé la konsege tanba jogadór Laloran tenta hamate tutuir jogu ne’ebé Hera United halo.
Jogu la’o, minutu mós la’o, jogadór sira halai haleu kampo laran duni malu ho bola kabuar ne’e, pasa bola husi ain ba ain maibé laiha ekipa ida mak prodús tan golu to’o minutu normal termina vitoria hela metin ho Hera United no derrota haksoit metin ba Laloran Wekeke fila ho laran susar.
Notísia relevante:Kopa Xanana: Klube Kampung Alor FC empata 1-1 ho Mulia FC
Jornalista: Hortencio Sanchez
Editór : Florencio Miranda Ximenes