iklan

DESPORTU, HEADLINE

Kopa Xanana: Klube Kampung Alor FC empata 1-1 ho Mulia FC

Kopa Xanana: Klube Kampung Alor FC empata 1-1 ho Mulia FC

Tasa Kopa Maun Boot Xanana Gusmao.Imajen/Hortencio Sanchez

DILI, 03 marsu 2024 (TATOLI) – Ekipa kapitál Dili ho naran istimadu Kampung Alor FC tenke empata ho adversáriu Mulia FC iha jogu kopa Maun Boot Xanana Gusmao ho eskore 1-1 tanba ekipa rua iha forsa ne’ebé la diferente.

Estádiu Munisipál Dili sai sasin ba ekipa rua ne’e iha, sesta lokoraik ne’e tanba hatudu jogu ne’ebé bonitu maibé forsa la dook malu.

Minutu jogu la’o árbitru hú arbitu lian jogadór sira husi parte rua lansa kedan kontra no atake ba malu tuir sistema jogu futeból nian. Kontra no atake ne’ebé ekipa rua halo iha adeptu lubun boot nia matan ne’ebé tur nahe aan iha tribun estádiu fó suporta makas.

Jogadór sira finta bola ba mai tuir orientasaun treinadór sira nian, maibé jogu kuaze hanesan, jogadór sira komesa kosar habokon ona kamijola ne’ebé sira hatais maibé nafatin mantein iha rezultadu 0-0.

Ekipa rua kuaze hatudu jogu ho ofensivu ka bola loke liu ba rede oin ekipa idaidak nian avansadu husi ekipa rua lansa sutu ne’ebé maka’as ba guarda rede, maibé sutu hirak ne’e seidauk kona iha alvu no balu guarda rede salva.

Ho nune’e jogu primeira parte termina laiha ekipa ida mak prodús golu nune’e rezultadu tenke mantein ho eskore 0-0.

Haku’ur ba segunda parte ekipa Mulia halo esforsu maka’as hodi fó ameasa maka’as ba rede Kampung Alor nian, halo Guarda Rede tenke utiliza enerjia makas hodi salva sutu ne’ebé mak avansadu Mulia lansa. Esforsu ne’ebé Mulia halo la hela de’it hanesan esforsu tanba iha minutu 55 jogadór Elizio Madeira (22) konsege prodús golu dala uluk muda rezultadu ba 1-0.

Golu ne’e sadik ona jogadór Kampung Alor tenke halo servisu makas liutan, nune’e bele halo empata jogu ne’e. Esforsu hirak ne’e halo liuhusi prosesu naruk. Liuhusi difikuldade tanba avansadu Kampung Alor tenke soke defeza Mulia ne’ebé metin hanesan moru.

Esforsu ho pasiensia husi jogadór Kampung Alor iha minutu 71, jogadór Nazario de Oliveira (10), konsege fera defeza Mulia hodi muda rezultadu ba 1-1. Golu ne’ebé Nazario responde bainhira bola barullu iha lina oin Mulia nian Guarda Rede laiha atensaun ho di’ak defeza sira laiha konsentrasaun mak Nazario hetan bola pasa ho kalma husi leten nia utiliza kedan nia ulun hodi (kabesa) tama kedan ba rede Mulia nian.

Husi golu ne’e mak termina ekipa rua nia jogu, laiha ekipa ida mak manán no ekipa rua tenke hein fali jogu tuir mai esfirsu makas nune’e bele ultrapasa ba faze tuir mai.

Notísia relevante: Kopa Xanana ho vizaun promove joven sira nia talentu

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!