DILI, 17 abríl 2024 (TATOLI) – “Ha’u-nia kaben Agustinho dos Santos “Mau-Regas” lakon iha Masakre Liquiça seidauk hetan to’o agora. Milísia Besi Merah Putih sira mak oho, tanba ha’u-nia la’en Vise Ajitasaun no Prapoganda Polítika CNRT (Konsellu Nasionál Rezisténsia Timorense), ho nune’e mak milísia sira oho nia”.
Vítima no sasin Masakre igreja São João de Brito Liquiça, Elisa da Silva dos Santos, fó sai bainhira dadalia ho jornalista Agência TATOLI Hortêncio Sanchez, iha edifísiu Sentru Nasionál Chega! (CNC-sigla portugés), Balide Dili, foin lalais.
Iha loron 05 fulan abríl situasaun iha Liquiça laran ami sente la seguru ona, fatin seluk laiha ba ami atu halai ba helik netik.
Milísia sira domina kintu-kantu halo ameasa ba mai maka’as, entaun ha’u ho ha’u-nia família hamutuk ho ha’u-nia kaben ami halai ba iha rezidénsia amu Parókia igreja Liquiça, Amu Rafael dos Santos.
Bainhira ami to’o iha fatin ne’ebá populasaun barak tebes ona mak konsentra hamutuk iha ne’ebá.
Iha dadeer 06 abríl 1999 milísia sira husi Maubara komesa tama mai ona iha parte Mauboke Liquiça nian, joven sira ne’ebé rezisténsia ne’e hala’o asaun hasoru sira, iha joven barak mak kanek no balun halai tanba forsa milísia nian maka’as ne’ebé akompaña hosi militár Indonézia sira.
Ho nune’e milísia konsege tama liu mai iha Liquiça, sira mai liu iha parte igreja hodi serku-metin halo ami halai sai la di’ak ami rona sira hakilar tolok trata madre no padre sira ho líder polítiku sira ne’ebé subar iha igreja laran.
Sira mós liu ba iha ami-nia uma, sira ba ne’e ho objetivu atu buka ha’u-nia katuas-oan atu oho, sira ba la hetan ami entaun sira sunu de’it ami-nia uma, ami-nia sasan hotu sira sunu no dada hela fita hale’u uma atu nune’e ami ba karik sira oho ami hotu.
Milísia sira tuun fali ba rezidénsia hale’u amu sira. Sira tolok trata ami aat los. Sira tiru hale’u igreja dehan katak buka lideransa CNRT sira subar iha rezidénsia amu sira-nian no igreja atu oho hotu.
Ami hela iha igreja durante loron rua kalan ida, bainhira situasaun manas ami halai sai husi uma nunka lori buat ida, lori de’it roupa uitoan ho hahan uitoan maibé la to’o ba ami atu han. Entaun, ami tahan de’it no hemu de’it mak bee.
Iha loron 05 abríl kalan tuku 08:00 joven na’in neen mai husi foho, sira ne’e komandu mak haruka atu lori sai hotu líder CNRT nian halai ona ba ai-laran tanba situasaun manas ona. Iha tempu ne’ebá, sira mai hasoru ha’u-nia kaben, Xefe Suku Dato, maibé sira na’in rua lakohi. Sira dehan, “Ita brani halo polítika ita labele husik hela povu sira mesak mate iha ne’e”. Entaun, sira la konsege sai kalan ne’e ami toba de’it iha amu nia rezidénsia.
Ami toba iha laran, rona iha li’ur ne’e milísia sira halo barullu ba mai tiru no tolok ami sira iha igreja laran. Bainhira dadeer iha 06 abríl ami hamlaha, ha’u-nia kaben husu mai ha’u: “Ita mai ne’e lori netik hahan ruma?” Ha’u hatan: “la’e”. Entaun, ha’u ba husu amu sira-nia foos uitoan atu halo sasoro ba ha’u-nia kaben ho ha’u-nia oan na’in tolu atu han.
Ha’u foin mak tau ahi atu halo sasoro, milísia sira halo barullu ona komesa oho ema iha igreja oin tama mai to’o laran, entaun ha’u-nia kaben sira halai ba subar iha amu Rafael nia haris-fatin. Tanba ema mate barak ona ha’u-nia oan feto ida boot ne’e toman liu nia papa, só na’in rua kiik mak toman ho ha’u, ami halai fahe malu, ha’u ho kiik-oan na’in rua halai ketak. Ha’u-nia laen ho oan ida boot halai ketak.
Bainhira ami halai sai husi igreja iha maluk timoroan balun ne’ebé serbisu ho militár Indonézia sira mak tulun ami hodi lori sai akompaña ho militár sira lori ami ba rezidénsia Bupati nian. Bainhira halai sai mai ne’e ami halai de’it husi mate nia leten tanba ema oho ema barak ona iha li’ur.
Bainhira to’o iha Bupati nia uma ami haree ema barak mós iha ne’ebá ona. Sira balu kanek, raan suli los. Ami tuur la kle’ur ha’u-nia oan-feto boot mós halai to’o ba Bupati nia uma. Bainhira ha’u-nia oan-feto to’o mai nia dehan, “Mãe, pai laiha ona. Ema oho ona pai.” Rona novidade ne’e ami sente lakon. Tanis. Bainhira ami tanis milísia sira hakilar ami, “Tanis saida? Saida mak lakon mak tanis?”. Sira ko’alia ho maka’as no ameasa.
Tanba ta’uk, ami mós nonok maibé laran dodok los. Bainhira lorokraik ona ema husu ba ami: “Se mak hakarak atu ba igreja ba foti fali imi-nia sasan?”. Entaun, ha’u ho ha’u-nia oan sira mós atu tuun ba haree ami-nia sasan ruma atu foti. Maibé, ami tuun husi Bupati nia uma to’o iha Estrada-boot milísia tiru tan ami. Entaun ami halai, no ema balun hakilar, “Lalika ba! Se hakarak mate entaun ba”. Entaun, ha’u ho ha’u-nia oan na’in tolu fila fali mai rezidénsia Bupati nian.
Tuur iha Bupati nia uma la kle’ur ema dehan, “Se mak hakarak fila ba ida-idak nia uma bele fila ona?”. Entaun, ami tenke fila ba ami-nia uma. To’o iha uma, ami labele hela tanba ema sunu mutuk no dada hela fita. Entaun ami la’o fali ba família sira-nia uma. Tuir dalan, ami sente mesak ona ami tanis no ami la’o hela hasoru milísia sira ameasa lori katana atu tá ha’u-nia oan. Ami na’in tolu ami husu deskulpa no sira husik ami la’o liu.
Durante ne’e ami hela tiha iha família nia uma iha Bairru Santa Cruz, Liquiça. Maluk sira ami hela ba ne’e sira-nia família balun husi Maubara milísia hotu. Milísia sira la’o ba mai. Kalan ne’e, sira mós halo mate eletrisidade hotu atu nune’e bele tula sai mate iha igreja lori ba soe inklui ha’u-nia kaben.
Ha’u la hatene mate-isin sira ne’e lori ba soe iha ne’ebé inklui ha’u-nia laen. Durante tinan-25 ona ha’u nunka hatene ha’u-nia kaben nia paradeiru iha ne’ebé.
Hela iha Liquiça mós ami sente la seguru tanba milísia sira buka tuir los ami hakarak atu oho mate hotu. Sira ba haree ami-nia uma sunu ne’e sira husu, “Uma ne’e nia na’in iha ne’ebé? Ami kuandu hetan sira ami oho mate hotu”.
Entaun, ami sente la di’ak ha’u ho ha’u-nia oan na’in tolu halai mai hela iha Dili. Durante iha Dili ami hela iha Mandarin Eis-Administradór Jaime de Oliveira mak fó uma ida ba ha’u ho ha’u-nia oan sira hela.
Durante ne’e ami hela komesa hakmatek uitoan. Nune’e tiha, iha 30 agostu ami ba tuir votasaun ba referendu nian, bainhira vota hotu ami halai sa’e ba subar iha Daré.
Iha Daré hotu ita ukun aan ona ami foin tuun fali mai Dili no ba hadi’a fali ami-nia uma iha Liquiça atu ami hela fali to’o ohin loron.
Ha’u-nia oan tolu ne’e naran mak ne’e, Julieta Juselina dos Santos, Octaviana Francisca dos Santos no Quartinho Francisco dos Santos.
Rekomendasaun ba Estadu
Ha’u-nia laen mate to’o ohin loron la hetan nia ruin iha ne’ebé, maibé ita orgullu tanba sira-nia mate mak ita hetan ona independénsia.
Nune’e iha ukun aan ida-ne’e ami família vítima, feto-faluk oan-ki’ak. Husu ba Estadu atu tau atensaun mai ami. Ajuda selu ami-nia oan sira-nia eskola no valoriza mós ami-nia direitu.
Vítima barak mak hetan torturasaun to’o sira-nia kondisaun saúde agrava, maibé sira seidauk hetan tratamentu ida ne’ebé espesiál hanesan veteranu.
Ita haree agora sobrevivente barak mak hela iha uma ne’ebé la dignu. Iha balun hela ona iha uma dignu ne’ebé mak CNC (Sentru Nasionál Chega!) rasik mak harii ba sira seidauk barak, foin mak 10-resin.
Husu nafatin ba Estadu atu tau orsamentu ba iha CNC atu nune’e bele harii uma ne’ebé dignu ba maluk sobrevivente sira, la’ós de’it Masakre Liquiça maibé masakre seluk iha Timor-Leste.
Rekomendasaun hirak ne’e atu nune’e molok maluk sobrevivente sira mate mós sira sente no goza netik ukun aan ida ne’e.
Notísia relevante:Masakre Liquiça (II): “Milísia sira tiru ha’u, uza kilat rakitan”
Jornalista: Hortêncio Sanchez
Editór: Rafael Ximenes de A. Belo
