Governu atribui sertifikadu deklarasaun benefísiu ba empreza lokál Roman Star
DILI, 19 abríl 2024 (TATOLI)–Governu liuhusi Ajénsia TradeInvest, sesta ne’e, atribui sertifikadu deklarasaun benefísiu ka investimentu ba empreza Roman Star Industriál Lda, ho fatin investimentu iha área Darasula, suku Gariuai, postu Baucau Vila, munisípiu Baucau.
Koordenadór Jerál Ambiente Ministériu Koordenadór Asuntu Ekonómiku (MKAE), Jorge Rui de Carvalho Martins, hateten, IX Governu Konstitusionál iha kompromisu hodi apoia investmentu hosi setór privadu sira tanba hakarak hadi’a kresimentu ekonómiku rai-laran.
“IX Governu nia polítika katak sai nafatin fasilitadór ba investimentu lokál no internasionál nune’e kria nafatin kondisaun ba emprezáriu lokál. Ita iha polítika barak dinámika tebes, entaun ita fó vantajen ba setór privadu sira atu book-an, ne’ebé sira hanoin kria rasik indústria, do que importa,” Koordenadór Jerál, Jorge Martins hateten hafoin entrega sertifikadu investimentu, iha Gabinete MKAE, Farol.
Empreza Roman Star hahú investimentu iha tinan 2013, ho atividade komérsiu iha nesesidade bázika no ba fali importasaun sasán hanesan bebida (cocacola, sprite), no bee hemu, iha tinan 2022.
“Investimentu ne’e hamutuk ho parseiru husi Singapura, ho totál investimentu millaun $6,3. Sira esforsu maka’as hakarak kontrribui duni ba setór privadu hodi oferese postu serbisu ba timoroan sira,” nia akresenta.
Notísia relevante : Governu atribui sertifikadu deklarasaun benefísiu ba empreza Aero Dili
Koordenadór subliña, empreza Roman Star nu’udar empreza lokál ne’ebé Governu tenke apoia tanba sira iha vontade atu halo investimentu.
Iha biban hanesan, Diretór Ezekutivu Roman Star Industriál, Francisco Paul Sarmento, agradese ba IX Governu liuhusi TradeInvest ne’ebé hatudu duni seriedade hodi tulun setór privadu atubele muda pensamentu investimentu públiku ba privadu.
“Tanba ne’e maka ami-nia empreza hetan deklarasaun benefísiu husi TradeInvest, ami-nia kompromisu maka tempu badak ami sei halo lansamentu ba obra referidu,” nia tenik.
Empreza halo planu negósiu ne’ebé submete ba TradeInvest, ho istimasaun, sei fó benefísiu direta ba traballadór timoroan hamutuk na’in-250 no inderetamentu 1.250-resin, nune’e totál hamutuk 1.500.
“Sei serbisu hamutuk ho agrikultór sira atu prepara no kuda ai-fuan atu nune’e bele oferese ba ami hodi halo produsaun sai bebida tanba ai-fuan mak sai matéria prima,” Responsável empreza informa.
Planu negósiu ne’ebé sei avansa iha tinan 2024 maka bee ho marka aqua, bebida-midar, jus no tua-manas.
“Ami durante ne’e halo importasaun bee ho marka aqua hosi rai-li’ur mai maibé tanba merkadu livre entaun susar atu kontrola presu, ne’ebé ami hakarak prodús rasik bee ne’e ho marka aqua iha Timor hodi bele kontrolu di’ak liután presu no kualidade,” nia haktuir.
Atividade ne’e partisipa husi ekipa empreza Roman Star ho parseiru no Diretór Ezekutivu TradeInvest, Arcanjo da Silva no nia ekipa.
Jornalista : Antónia Gusmão
Editora : Julia Chatarina
