iklan

EKONOMIA, HEADLINE

Governu atribui sertifikadu deklarasaun benefísiu ba empreza Aero Dili

Governu atribui sertifikadu deklarasaun benefísiu ba empreza Aero Dili

Ministru Koordenadór Asuntu Ekonómiku, Joaquim Amaral, akompaña hosi membru Governu balun entrega sertifikadu deklarasaun benefísiu ba Diretór empreza Aero Dili, Lorenço de Oliveira, iha salaun TradInvest, kinta (04/05/2023). Imajen Tatoli/Francisco Sony

DILI, 04 maiu 2023 (TATOLI)–Governu liuhosi Ajénsia TradeInvest, kuarta ne’e, atribui entrega sertifikadu deklarasaun benefísiu ka investimentu ba empreza Aero Dili.

Ministru Koordenadór Asuntu Ekonómiku, Joaquim Amaral. Imajen Tatoli/Francisco Sony

Ministru Koordenadór Asuntu Ekonómiku, Joaquim Amaral, hato’o apresiasaun no orgullu ba empreza nasionál ne’e tanba investe ona iha área estratéjiku no hamorin nasaun nia naran liuhosi Bandeira Timor-Leste iha aviaun.

“Lori Governu nia naran, hato’o parabéns ba empreza Aero Dili. Investimentu ne’e estratéjiku no importante tebes, nu’udar investimentu dahuluk ne’ebé hatuur bandeira Timor-Leste iha aviasaun. Ida-ne’e la fasil atu liu prosesu tomak, maibé ho esforsu sira ne’e sira halo ho konfiansa, ikus mai empreza konsege hetan nune’e empreza nasionál ida bele ona tau bandeira Timor,” Ministru hateten iha ámbitu atribuisaun sertifikadu investimentu, iha salaun TradeInvest, Colmera.

Notísia relevante : Aviaun Aero Dili sei realiza vou komersiál dahuluk iha 28 marsu

Governante ne’e konsidera, Governu iha obrigasaun atu apoia no proteje investidór nasionál iha investimentu hotu tuir dalan legál, liu-liu investimentu estratéjiku sira hanesan hosi Aero Dili. Governu halo esforsu atubele tulun investidór sira hotu atu halo investimentu iha área ne’ebé de’it iha Timor-Leste.

“Governu atribui deklarasaun benefísiu atu empreza bele goja benefísiu fiskál aduaneiru, tuir lei investimentu privadu. Hein katak ho apoia ne’e empreza bele halo operasaun ho susesu atu nune’e kontinua promove Timor-Leste iha setór turizmu. Ita halo promosaun ba turizmu maibé bainhira ita-nia konetividade ladún efetivu mak ladún hetan vitória di’ak, nune’e ita sei hetan difikuldade hodi dada turista mai vizita ita-nia rain. Tanba ne’e, presiza mós hadi’a infraestrutura aeroportu,” Ministru akresenta.

Komprometidu forma rekursu timor-oan

Iha biban hanesan, Diretór empreza Aero Dili, Lourenço de Oliveira, relata, empreza ne’e hahú halo ona investimentu millaun $12 ba tinan dahuluk, normalmente ho demanda ne’ebé mak sei mosu iha indústria aviaun Timor-Leste no tinan oin ho projesaun investimentu sei sa’e to’o millaun $20 inklui aumentu aeronave foun hodi bele loke rota pioneira hodi hatán ba nesesidade merkadu rejionál.

Diretór Aero Dili, Lourenço de Oliveira. Imajen Tatoli/Francisco Sony

“Aero Dili sei konstroe nasaun nia ema, hodi loke sentru treinamentu iha tinan-tolu ba oin. Investimentu iha kapitál umanu sai hanesan pilár importante atu garante susesu iha indústria aviasaun. Sentru treinamentu ida-ne’e sei loke iha Dili ho programa trainamentu ba pilotu, aermosa, enjiñeiru, mekániku no ajénsia Estadu sira ne’ebé presiza kontinua halo promosaun. Ida-ne’e mak ami-nia kompromisu boot,” Lourenço de Oliveira tenik.

Fulan oin nu’udar faze dahuluk ba Aero Dili hodi haruka rekursu umanu timor-oan ba eskola hanesan pilotu na’in-neen, aermosa na’in-10, no enjiñeru na’in-tolu iha Fransa, Estadu Unidu Amérika no Dubai.

“Empreza airbus mak oferese pakote edukasaun ba rekursu umanu ho totál pilotu 26, airmosa 20, enjiñeru no mékaniku hamutuk 30. Aero Dili nia mehi ba tinan-tolu ba oin, sei bele semo ba Eropa, ho montante investimentu bele atinje to’o millaun $50. Tanba ne’e ho apoiu ne’ebé Governu fó hodi atribui deklarasaun benefísiu mai Aero Dili, ami sei haka’as-an atubele aproveita oportunidade ho fasilidade hotu ne’ebé Estadu oferese hodi bele konkretiza mehi atu nakfilak ba realidade iha futuru,” nia subliña.

Na’in ba empreza ne’e dehan, sei aproveita oportunidade hosi apoiu Governu liuhosi Ministériu no ajénsia relevante sira hodi servisu hamutuk atubele realiza planu investimentu. Tanba ne’e, hanesan setór privadu buat ne’e importante liu mak Governu bele garante estabilidade atu nune’e setór privadu bele buras hodi kontribui ba dezenvolvimentu ekonómiku nasaun.

“Ezisténsia Aero Dili atu fó previleiju ba timor-oan hotu atubele halo viajen ba rai hotu ho presu baratu hodi bele goja independénsia ida-ne’e,” Empreza ne’e tenik.

Jornalista     : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!