DILI, 22 abríl 2024 (TATOLI) – Armanda Berta dos Santos re-eleitu ba kargu Prezidente Partidu Kmanek Haburas Unidade Nasionál Timor Oan (KHUNTO) ba mandatu tinan haat (2024-2028).
Berta re-eleitu liuhosi rezultadu kongresu Partidu KHUNTO nian ba dala-haat, hahú iha sábadu (20/4) horseik no domingu (21/4), ohin.
Liuhosi votasaun, kongresita 880 fó sira-nia votu hodi depozita konfiansa ba Berta hodi kontinua lidera partidu KHUNTO ba mandadu tinan-haat.
Biban ne’e, kongresista sira hosi partidu KHUNTO fó sira-nia votu konfiansa ba Elídio de Araújo hodi okupa kargu Sekretáriu Jerál Partidu KHUNTO ba mandatu tinan-haat.
Berta husu ba estrutura foun atu mantein hodi servisu hamutuk lori partidu KHUNTO ba oin liután hodi lori povu no nasaun nia interese.
“Ba oin ho estrutura foun ida-ne’e bele servisu di’ak liután ba povu nia moris, presiza ita-nia servisu hamutuk hodi lori nasaun ne’e ba oin”, Berta nia intervensaun iha ámbitu Kongresu Nasionál Partidu KHUNTO ne’ebé halao iha Salaun Delta Nova, domingu.
Prezidente Partidu KHUNTO agradese ba Konselleiru másimu Partidu KHUNTO no kogresita ne’ebé fó ona konfiansa hodi dala ida tán hodi lidera partidu ba madatu tinan-haat.
“Ba konselleiru másimu no kongresista hotu, imi nia konfiansa mai ami hodi servisu lori partidu ba oin, liuliu atu haree ba eleisaun ne’ebé sei tuir iha tinan-lima tuir filozofia partidu nian Tane O lisan, Tane O rain no Tane O emar” nia afirma.
Iha fatin hanesan, Sekretáriu Jerál Partidu KHUNTO Elídio de Araújo, agradese tebes ba esforsu sira ne’ebé kongresista sira no konseleiru partidu hodi depozita konfiansa hodi asume kargu Sekretáriu Jerál KHUNTO ba tinan-haat.
“Ohin ha’u bele hambrik ho kolega sira, laos tanba ami nian kbi’it maibé tanba ema barak nia intervensaun ho sira-nia matenek no sira-nia servisu makas, nune’e mak iha biban ida-ne’e, ha’u hato’o obrigadu wain, ha’u hanoin, ha’u konvida ita tomak ne’ebé hetan fiar hodi servi povu liuhosi partidu KHUNTO, iha biban ida-ne’e tenke servisu makas no matenek ho attitude, ita mak servi ita-nia povu”, nia adianta.
Nia dehan, responaablidade ne’ebé atribui ne’e nu’udar responsablidade ne’ebé todan maibé hanesan Sekretáriu Jerál promete sei servisu hamutuk ho Vise Sekretáriu Jerál na’in-haat mak sei servisu hodi lori partidu KHUNTO ba oin ho di’k liután.
“Ha’u husu deskulpa ba lider másimu ba ita-nia prezidente no maluk sira hotu katak ami simu responsablidade iha ne’e tuir loloos todan, mas ami fiar katak laos ami mesak de’it, maibé ho kordenadór sira, konselleiru sira, lider másimu ho prezidente, ha’u fiar ita hamutuk ita sei bele hodi partidu KHUNTO ne’e ba oin”, nia hateten.
Konseleiru Másimu KHUNTO José dos Santos Naimori Bukar, hateten husu ba estrutura foun atu halo servisu ne’ebé di’ak ba povu no nasaun nia di’ak ba futuru, tanba kargu ne’e responsablidade.
Naimori husu ba estrutura KHUNTO atu labele halimar facebook para trata ema hateten ema ne’e labele.
“Ne’e laos lideransa ida ne’ebe ki’ik ema uitoan presiza ita hotu kuidadu malu para atu lori rai ne’e ba oin”, nia fó hanoin.
Mari Alkatiri no Taur Matan Ruak kongratula KHUNTO
Iha biban ne’e mós, Sekretáriu Jerál Partidu FRETILIN, Mari Alkatiri iha nia intervensaun, dehan KHUNTO hanesan organizasaun partidu importante ida, tan ne’e presiza eziste nafatin.
“Khunto Partidu ida ke importante, eleisaun foin liubá ne’e, PLP mós lakon deputadu, FRETILIN mós lakon deputadu, KHUNTO mak la lakon, parabens ba KHUNTO ne’ebé halo nia kongresu nasionál ba dala-haat, husu ba estrutura partidu KHUNTO atu hatene sé mak partidu aliadu no se mak la’os aliadu”, nia dehan.
Nune’e mós, Prezidente Partidu Libertasaun Popular (PLP), Taur Matan Ruak, parabeniza partidu KHUNTO ne’ebé mak halao nia kongresu.
“Ha’u hakarak kongratula imi no espera ho kongresu ida-ne’e, bele sai di’ak liután”, nia dehan.
Estrutura partidu KHUNTO períodu 2024-2028
Berta nu’udar Prezidente Partidu KHUNTO ba mandatu tinan-haat ho nia Vise Prezidente na’in-lima hanesan Primeiru Vise Prezidente Partidu KHUNTO Nicolau Lino Freitas Belo, Segundu Vise mak Pedro dos Reis, Vise Prezidente datoluk Juvinal dos Santos, Vise Prezidente dahaat Ivo Lay Kolimau, Vise Prezidente dalima okupa hosi Odete Bilou.
Sekretáriu Jerál Partidu KHUNTO Elídio de Araújo, Vise Sekretáriu Jerál dahuluk mak Zetó, Vise Sekretáriu Jerál daruak mak Julião da Silva, Vise Sekretáriu Jerál datoluk Teodoro, Vise Sekretáriu Jerál dahat HJ. Mesale Benito, Vise Sekretáriu Jerál dalima nian Julião dos Reis.
Konseleiru Nasionál Partidu KHUNTO nian António Verdial de Sousa, Marito Magno, Luis Roberto, Rezina Soares Amaral, Amauci Magno, Elda da Costa Barros, Miquela Ximenes Durante da Costa Sarmento, Armindo D, M Afonso Ismael A.Lopes.
Konsellu Juridisaun Verifikasaun Konta Partidu KHUNTO nian kompostu hosi Ramelau da Costa Lopes hanesan Prezidente Konsellu Juridisaun, Vise Prezidente Agustinho de Jesus, Terseiru Vise Prezidente Konsellu mak Tito Livio, Arist0teles, João no Aranalo. Enkuantu iha kongresu KHUNTO hili ema nain tolu ba tezoreiru nasionál partidu KHUNTO.
Jornalista: Natalino Costa
Editór : Zezito Silva
