AILEU, 23 abríl 2024 (TATOLI) – Vise Ministru Komérsiu no Indústria (MCI), Agusto Trindade Junior, hateten ministériu sei fó sai iha tempu badak (em breve) konkursu públiku ba reabilitasaun merkadu Manleuana no Taibesi.
“Ita-nia merkadu rua, daudaun ne’e, iha ona prosesu atu anunsia konkursu públiku liuliu atu halo reabilitasaun, tanba ne’e parte aprovizionamentu no finansa husi MCI tuur hamutuk ona hodi prepara dokumentu atu halo anúnsiu públiku ba prosesu ida-ne’e”, Trindade Junior informa iha Kasnafar Aileu, ohin.
Nia esplika, reabilitasaun ne’e haree liubá buat kiik-oan sira ne’ebé mak Governu presiza hadia hanesan haris fatin no uma balun ne’ebé aat ona.
“Laos ita halo boot liu, maibé atu halo de’it reabilitasaun balun ba merkadu rua atu garante katak merkadu ne’e lao nafatin no la’o ho di’ak, tanba ami servisu hamutuk ho Prezidente Autoridade Munsípiu Dili, Sekretáriu Estadu Asuntu Toponimia no Organizasaun Urbana (SEATOU) no Ministériu Administrasaun Estatal (MAE), ami identifika ona buat sira ne’e no BoQ, entaun dezeñu sira ne’e, Ministériu Obras Publika (MOP) halo ona aprovasaun no agora iha ona finansas no aprovizioanmentu atu halo konkursu”, nia relata.
Nia afirma, orsamentu ne’ebé atu reabilita merakdu Taibesi no Manleuana mai hosi Ministériu Komérsiu no Indústria hamutuk rihun 200.
“Orsamentu ne’e mai hosi ami no orsamentu ida-ne’e laos boot liu, maibé iha de’it rihun 200 ba reabilitasaun merkadu rua ne’e no ita-nia dezeñu ho BoQ iha hotu ona, entaun semana ida-ne’e nia laran halo ona anunsia ba públiku tanba horseik ha’u bolu ona aprovizioanmentu no finansa katak dokumentu sira finaliza hotu ona no hein atu anunsia ba públiku”, nia konklui.
Jornalista : Felicidade Ximenes
Editór : Zezito Silva
