Fundasaun Mahein lamenta pesoál SNI tiru kanek joven iha Covalima
DILI, maiu abríl 2024 (TATOLI) – Diretór Ezekutivu Fundasaun Mahein (FM), Nelson Belo, lamenta ho aktu hosi membru servisu sekretu Servisu Nasionál Intelénsia (SNI) ne’ebé uza arma tiru joven Elizáriu iha Postu Adminitrativu Tilomar, Munisípiu Covalima foin lalais ne’e.
“Ami lamenta tebes ho asaun ne’ebé mak ita-nia servisu sekretu hosi Servisu Nasionál Intelijénsia hodi uza arma tiru kanek ita-nia joven ida iha Colvalima, asaun ne’e akontese ona, maibé ba Fundasaun Mahein asaun sira hanesan ne’e la nesesáriu atu uza arma, laiha nesesariumente atu uza arma tanba laiha urjénsia no laiha ordem ida atu uza”, Nelson Belo hateten ba jornalista TATOLI iha nia kna’ar fatin Lecidere, sesta ne’e.
Nia subliña, lei ba kriasaun Servisu Nasionál Intelénsia, númeru 3/2009, 15 janeiru, hosi artigu 18 iha alinea b, hateten pesoál SNI iha direitu ba utilizasaun armas de fogo, maibé SNI laiha prosedimentu legál sira ne’ebé regula kona-ba utilizasaun armas liuliu atu regula membru F-FDTL no PNTL ne’ebé destaka iha SNI bainhira mak atu uza arma no ba situasaun ida oinsá.
“Hanesan agora daudaun akontese katak iha kazu Covalima nian ne’e, tuir informasaun ne’ebé hosi Fundasaun Mahein iha katak membru F-FDTL ne’ebé agora daudaun hola parte iha servisu SNI destakadu Suai mak halo asaun tiru joven ne’e, maibé atu dehan katak bainhira membru F-FDTL antes ne’e biar nia iha arma, maibé kuandu nia halo ona kna’ar iha Servisu Intelijénsia nia tenke tuir prosedimentu Servisu Intelijénsia Nasionál no tenke tuir regulamentu ba uzu arma bainhira mak halo asaun no lahalo asaun. Tanba Servisu Nasionál Intelijénsia ne’e atu rekolla informasaun laos uza arma atu tiru, ne’e laiha sirkunstánsia”, nia adianta.
Nelson hateten, situasaun iha Covalima la nesesáriu no laiha perigu ida ne’ebé ameasa autoridade Estadu hanesan membru SNI.
“Ami hateten dala ida tan katak situasaun Covalima ne’e la nesesáriu para membru SNI atu uza arma atu tiru kuandu sira sente iha situasaun perigu nia laran, situasaun labele los ona, entaun tuir prosedimentu tenke tiru sae hodi fó alarma katak atu hafahe ema sira ne’e, maibé labele uza arma hodi tiru uluk”, nia konklui.
Notísia relevante : Kazu tiru joven iha Covalima submete ba investigasaun
Jornalista: Natalino Costa
Editór : Zezito Silva
