MANATUTO, 05 maiu 2024 (TATOLI)— Governu Timor-Leste fasilita uma ida ba Tékniku Agrikultura hosi Provínsia Hunan atu bele halo levantamentu bá rai no buat ne’ebé bele prodúz iha Munisípiu Manatuto.
Tuir komunikadu imprensa husi Gabiente Primeiru Ministru katak, Uma ne’e lokaliza iha suku Aiteas, postu administrativu Manatuto-Vila, munisípiu Manatuto inagura direita husi Primeiru-Ministru (PM), Kay Rala Xanana Gusmão akompaña hosi Ministru Administrasaun Estatál (MAE), Tomás do Rosário Cabral hamutuk ho autoridade munisipál Manatuto, Embaixadora Xina iha Timor-Leste (TL), Wang Wenli no entidade Provínsia Hunan-Xina.
Primeiru-Ministru, Kay Rala Xanana Gusmão hateten, ekipa tékniku sira hosi Hunan la’ós de’it halo levantamentu bá Manatuto-Vila, maibé sei hare’e mós bá postu administrativu sira seluk hanesan Laleia, Laclo, Natabora, Soibada no Laclubar.
“Natarbora fatin ida kapás tebetebes, rai luan no barak mak seidauk dezenvolve. Tanba ne’e, Prezidente Autoridade to’o Autoridade postu sira tenke servisu hamutuk, kuandu imi baruk-teen ha’u haruka tékniku sira bá fali fatin seluk, lori foos folsom mak fa’an fali bá imi. Tenke servisu, importante tebtebes, saida mak ita lorloron bá importa hotu tanba ita baruk, lakohi servisu,” Kay Rala Xanana Gusmão hateten iha ámbitu inaugurasaun uma iha Manatuto, domingu ne’e.
Xefe Governu konta-tuir katak, iha tinan 2010 bainhira la’o hale’u Timor laran tomak, kona-bá Planu Nasionál Dezenvolvimentu 2011-2030, identifika ona katak, iha fatin hotu-hotu agrikultura familiar, katak família mak halo toos, ne’e duni iha tinan-lima ne’e Governu tenke haree ona bá agrikultura ida ne’ebé komersiál.
“Se la’e ita la bá oin, osan oitoan ne’ebé ita simu bá hotu rai-li’ur la tama iha ita-nia liman tanba ita iha fatin-fatin ne’ebé ita bele prodús osan la to’o iha ita-nia liman, depois ita dehan hela de’it moris a’at,” Primeiru-Ministru subliña.
Iha fatin hanesan, Ministru Administrasaun Estatál (MAE), Tomás do Rosário Cabral hateten, uma ne’e reabilita ho osan Programa Nasionál Dezenvolvimentu Suku (PNDS) tinan 2024 ho montante $11.137,00 ho nia konstrusaun durante fulan-tolu.
“Uma ne’e atu entrega bá delegasaun Hunan. Tékniku sira hosi Hunan mak sei hela. Sira mai atu halo levantamentu ba rai no buat ne’ebé bele prodús iha ita-nia rain. Sira konklui tiha iha Manatuto sei bá fali munisípiu seluk,” Tomás Cabral hateten.
Uma ne’ebé oferese ba Tékniku Agrikultura hosi Provínsia Hunan iha fasilidade sira hanesan kuartu lima kompleta ho kuziña.
Jornalista : Cidalia Fátima
Editor : Armandina Moniz
