Ostico FC halakon Lecidere FC ho eskore 2-1
DILI, 05 maiu 2024 (TATOLI) – Ekipa Ostico FC susesu iha nia jornada dahuluk hodi manán nia adversáriu Lecidere FC ho eskore 2-1, iha jogu kontinuasaun Kopa Maun Boot Kay Rala Xanana Gusmão ne’ebé realiza iha Estádiu Munisipál Dili, domingu lokoraik.
Bainhira minutu dahuluk la’o ekipa rua lansa kedan kontra no atake ba malu tuir tékniku no abilidade ekipa idaidak nian hodi buka vitória.
Ostico lansa kontra atake ne’ebé ho jogu ofensivu halo jogadór Lecidere susar atu hetan bola. Maske nune’e Lecidere nunka lakon vontade iha kampu laran, kontinua luta hodi hamate atake ne’ebé Ostico lansa.
Sutu barak jogadór Ostico halo maibé seidauk kona iha alvu, sutu barak mós Guarda Rede Lecidere tenta baku sai. Jogu la’o manas liutan, adeptu sira iha tribun leten hakilar ho lian maka’as fó suporta ba sira nia ekipa favoritu halo jogadór sira husi ekipa rua vontade sa’e makas hodi hatudu jogu ne’ebé bonitu.
Jogu la’o animu tebes, Ostico lansa kontra atake ne’ebé sériu halo Lecidere book-aan ladi’ak, nune’e iha minutu 24 bola barullu iha lina oin FC Lecidere nian, jogadór Joséfino Emmanuel (4) lansa kedan sutu ida ba rede Lecidere halo Guarda Rede la antisipa ho di’ak bola tama liu-ba laran hodi muda rezultadu husi 0-0 nakfilak sai 1-0.
Jogu la’o mana’as liutan, Lecidere halo mudansa jogu, maibé mudansa hirak ne’e hela de’it hanesan mudansa, nunka rezulta golu, maske halo atake ne’ebé másimu.
Maske hatama ona golu ida Ostico la nonok, kontinua nafatin jogu ho velosidade ne’ebé maka’as, maibé laiha tan golu ruma mak akontese ba ekipa rua, ho nune’e jogu parte dahuluk termina provizóriu ho 1-0.
Haku’ur ba segunda parte, ekipa rua lansa kontra no atake ba malu hodi halo pasa bola ba malu, finta malu ba mai, maibé Ostico iha forsa ne’ebé signifikativu, tanba iha minutu 46 jogadór Mario Donancio (11) lansa tan golu ida hodi hatu’ur rezultadu ba 2-0.
Golu ne’e halo Lecidere laran tiste liutan, tenke servisu másimu liutan hodi buka hatama golu, maibé jogadór Ostico tenta hamate tutuir atake ne’ebé Lecidere halo halo Lecidere falla liutan.
Biar-nune’e Lecidere nafatin pasiensia hodi hala’o jogu tuir tékniku no abilidade rasik, maske hasoru presaun maka’as husi adversáriu. Esforsu hirak ne’e la sai de’it hanesan esforsu, tanba iha minutu 78, jogadór Fernando de Jesus hetan oportunidade bainhira bola barullu iha lina oin, Jogador Ostico nian utiliza oportunidade ne’e hodi lansa sutu ida tama liu-ba rede hodi muda rezultadu ba 2-1.
Golu ne’e mak sai golu ikus ba ekipa rua tanba kontra ateke ne’ebé ekipa rua halo iha minutu ikus, laiha ida mak prodús tan golu, ikus minutu termina vitoria monu ba Ostico no derrota monu ba Lecidere hodi hein tan jogu seluk tuir mai.
Notisia relevante:Kopa Xanana: Klube Kampung Alor FC empata 1-1 ho Mulia FC
Jornalista: Hortencio Sanchez
Editor: Florencio Miranda Ximenes
