DILI, 08 maiu 2024 (TATOLI) – Tribunál Judisiál Primeira Instánsia Dili (TJPID) iha kuarta (8/5) ne’e, hahú halo julgamentu ba arguidu Longuinhos Monteiro ne’ebé envolve kazu rai arma ilegál iha nia rezidénsia Liquica no Fomento Dili iha tinan kotuk.
Ministériu Públiku akuza Longuinhos Monteiro ba krime rai arma illegál iha nia rezidénsia no arguido.
Kazu ne’e rejista iha Polísia Sientífika Investigasaun Kriminál ho númeru NUC 003.
Iha prosesu julgamentu dahuluk, Ministériu Públiku ne’ebé kaer kazu Longuinhos Monteiro nian, Prokuradór Domingos Goveia, hato’o rekerimentu ba Tribunal liuhosi Juiz koletivu ne’ebé kaer kazu ne’e, atu kontinua realiza audiénsia julgamentu ba arguidu Longuinhos Monteiro ba krime rai arma illegal.
“Iha rekerimentu ne’ebá, Ministériu Públiku husu para Tribunál koletivu ida-ne’e kontinua halo jugamentu ba arguidu”, Prokuradór Domingos Goveia hateten iha sala julgamentu TJIPD, kuarta ne’e.
Nia relembra, ekipa konjunta momentu halo buska no apreensaun dala-rua ba arguidu nia rezidénsia iha Liquica no Fomento, dala ida ho mandadu judisiáriu hosi Tribunal, maibé buska no apreensaun ne’e anula tiha hosi Tribunál tanba autoridade sira halo apreensaun ho forsa hosi oras ne’ebé lei hateten. Nune’e Defeza hosi arguidu Longuinhos Monteiro husu Tribunál anula tiha prosesu ne’e.
Goveia hatutan, depois ida-ne’e, iha loron ne’e kedan, ekipa konjunta kontinua halo buska no aprensaun ba arguidu nia rezidénsia Liquica no Fomento. Ida-ne’e bazeia duni ba mandadu judisiáriu hosi Tribunál nian no tuir duni lei.
“Maibé hosi parte Defeza arguidu nian, hato’o rekerimentu ida ba Tribunál atu anula tiha prosesu buska no apreensaun ne’ebé ekipa halo ba arguidu nia rezidénsia por segunda vez ne’e, tanba defeza haree katak buska no apreensaun ida-ne’e viola regra no prosedimentu balun iha buska no apreensaun”, nia salienta.
Prokuradór hateten, Ministériu Públiku hanesan reprezenta Estadu Timor-Leste hodi halo sevisu tuir lei hodi verifika asaun sira ne’e, entende katak aktu ne’ebé mak ekipa konjunta halo ne’e bazeia ba lei tanba sira halo buska no apreensaun ne’e bazeia ba mandadu judisiáriu hosi Tribunál.
“Tanba ne’e, Ministériu Públiku entende katak prosesu ne’e kontinua ba oin no husu Tribunál koletivu ida-ne’e atu kontinua halo julgamentu ba prosesu ida-ne’e tanba la viola lei ruma”, nia afirma.
Hafoin rona tiha deklarasaun hosi Ministériu Públiku nian ba prosesu ne’e, Juiz Maria Solana, hateten hanesan Juiz ne’ebé kaer prosesu ne’e sei kontinua loke prosesu ne’e ba oin.
“Ita sei kontinua loke julgamentu kazu ne’e tanba ne’e husu ba arguidu katak ba oin tenke kolabora ho Tribunál”, nia dehan.
Hafoin ida-ne’e, Tribunál kontinua fali julgamentu ne’e iha 15 fulan-Maiu 2024, oras tuku 14:00 loraik hodi rona deklarasaun arguidu Longuinhos Monteiro.
Audiénsia ba julgamentu ne’e prezide hosi Juiz Koletivu, Juiza Maria Solana Fernandes, Afonso Carmona no Juiza Albertina Neves, Ministériu Públiku reprezenta hosi Prokuradór Domingos Goveia no arguidu hetan asisténsia legál hosi Advogadu Privadu João Pavão Sera.
Arguidu Longuinhos Monteiro, daudaun ne’e, asume pasta hanesan Diretór Servisu Nasionál Intelejénsia (SNI).
Notísia relevante : MP dehan kazu Longuinhos Monteiro sei iha prosesu, la’ós arkiva
Jornalista: Natalino Costa
Editór : Zezito Silva
