DILI, 09 maiu 2024 (TATOLI) – Ministru Interiór (MI), Francisco da Costa Guterres, sei tau atensaun ba hadia infraestrutura Polísia Nasionál Timor-Leste, iha tinan ne’e.
“Planu Ministériu Interiór ba tinan ne’e, ita foku iha infraestrutura PNTL nian. Prosesu hotu ba ida-ne’e, ita lao tiha ona, ita hein de’it depois mak imi haree. Infraestutura ba Polísia Nasionál Timor-Leste, imi lalika preokupa tanba tinan ida-ne’e ita halo infraestrutura mais de 100 projetu ba infraestrutura polísia nian”, Francisco Guterres ba jornalista sira iha nia kna’ar fatin Ministériu Interiór Vila-Verde, kinta ne’e.
Nia dehan, hosi projetu 100-resin ne’e kompostu hosi halo edifísiu Komandu Jerál PNTL, halo edifisiu Unidade Polísia Marítima (UPM) no halo Kuartel ba Unidade Patrollamentu Fronteira (UPF).
“UPM nia fatin ne’e ladún di’ak, tanba uma ne’e halo besi, barak liu kuandu udan mak monu sirkuitu ruma mak bele fó impaktu ba membru PNTL sira ne’ebé destaka iha ne’ebá inklui uma ba UPF sira, postu sira no mós eskuadra sira no edifísiu ba Komandu PNTL Munisipiu sira ita halo hotu ona dezeñu no orsamentu ita aloka ba infraestrutura sira ne’e, ita hein ida-ne’e, ita hahú avansa ona infraestrura sira ne’e”, nia afirma.
Governante hateten, montante orsamentu ba infraestrutura sira ne’e ladún hatene, maibé orsamentu ne’e iha ona no tinan ne’e sei hadia infraestrutura PNTL nian.
“Ita bo’ot sira hatene insfraestrutura, disipliña no komunikasaun parte ida hosi profisionalizmu PNTL”, nia konklui.
Jornalista: Natalino Costa
Editór : Zezito Silva
