Prezidente Autoridade RAEOA inaugura edifísiu Edukasaun Oé-Cusse
OÉ-CUSSE, 09 maiu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, kuarta ne’e, inaugura reabilitasaun edifísiu Sekretaria Rejionál Edukasaun no Solidariedade Sosiál iha suku Costa, sub-rejiaun Pante Masakar.
“Agradese ba administrasaun sesante mak hahú obra ida-ne’e, ita fó obrigadu ba sira, maibé ita-boot sira (edukasaun) imi sei muda mai iha-ne’e, ha’u kontente tanba iha tempu badak ita selebra akordu ho empreza ida atu hadi’a ita-boot sira-nia fatin ba otél Ambeno,” Rogério Lobato, ko’alia iha inaugurasaun ne’e.
Notísia relevante: RAEOA aloka millaun $2-resin harii eskola foun 19 no hadi’a edifísiu rua
Eis-Ministru Interiór ne’e, fó hanoin ba dirijente no funsionáriu sira iha edukasaun, atu kontinua mellora serbisu edukasaun hodi kualifika rekursu umanu ba futuru Oé-Cusse nian.
“Sekretária Rejonál Edukasaun, ita-boot mai iha-ne’e, lidera edukasaun Oé-Cusse di’ak liután, ita tenke halo Oé-Cusse nia oan barak matenek, tanba rikusoin iha mundu ne’e mak ema, entaun ita-boot iha misaun atu hadi’a edukasaun ne’e, sai di’akliu,” nia apela.
Sekretária Rejionál ba Asuntu Edukasaun no Solidariedade Sosiál, Inácia Tamele, reprezenta serbisu edukasaun Oé-Cusse hato’o agradese ba Governu anteriór, tanba dezenvolve no prepara projetu ida-ne’e to’o ohin loron bele inaugura ho susesu.
“Hanesan ita hatene, katak Estadu mak ita, nune’e ha’u informa sei hamutuk ho ekipa tomak sei tau matan didi’ak ba edifísiu foun ne’e, tanba fasilidade ne’e bele ajuda ona ami-nia serbisu hodi serbí ita-nia povu, liuliu estudante no manorin sira,” nia promete.
Nia husu ba autoridade lokál, komunidade sira iha pertense suku Costa, atu apoia Autoridade kuida edifísiu ne’e, atu labele riska no hakerek hodi hafo’er edifísiu foun, ne’ebé foin inaugura, tanba ne’e fasilidade públiku ba ema hotu.
Notísia relevante: Autoridade RAEOA harii pré-eskolár rua no EBF ida iha aldeia Sanane
Projetu ne’e reabilita husi kompañia Sikoneroc Unipesoál Lda, ho valór kontratu $89,271.01, orsamentu ne’e Autoridade RAEOA aloka husi Orsamentu Jerál Estadu (OJE) 2023 nian, hahú ezekuta iha loron 13 outubru 2023.
Jornalista: Abílio Elo Nini
Editór: Evaristo Soares Martins
