Arnolf Teves hakerek karta iha prizaun husu Governu salva ninia vida
DILI, 10 maiu 2024 (TATOLI) – Rekluzu hosi Arnolf Teves Jr hakerek karta ba Governu liuhosi Ministru Justisa, iha Prizaun Bekora, ho objetivu atu salva ninia vida.
Ministru Justisa Sergio Hornai, simu karta hosi Arnolf Teves Jr, iha kinta-feira, ho nia konteúdu, husu atu salva ninia vida no ministru sei submete ba Konsellu Ministru atu diskute.
“Ha’u simu ona dokumentu, hanesan ministru justisa, hanesan autoridade, ha’u halo koordenasaun ho autoridade sentrál ho nasaun orijen ba ita-nia sidadaun refere. Ha’u labele halo espekulasaun tanba ha’u tenke iha desizaun ida serteza iha tempu sira mai. Ha’u iha dez dias para desidir”, Sergio Hornai hateten ba jornalista sira iha Ministériu Finansas sesta, ohin.
Governante ne’e akresenta katak sei lori pedidu ne’e ba Konsellu Ministru atu diskute, rona opiniaun balun hosi Konsellu Ministru molok Ministru Justisa foti desizaun ba pedidu ne’e.
“Konserteza ha’u sei rekorre opiniaun balun ba iha Konsellu Ministru atu bele fó hanesan opiniaun. Molok ha’u halo desizaun ida ba ida-ne’e tanba ha’u labele naran halo desizaun”, nia dehan.
Nia dehan, asuntu Arnolf Teves Jr enfrenta prosesu judisiáriu rua, mak azílu, hanesan Ministru Justisa tenke haree fila fali ba rekezitu kona-ba lei kooperasaun judisiál internasionál ninian ne’ebé mak admite Timor-Leste hanesan Estadu atu haree sasan ida-ne’e entre fuzitivu ne’ebé maka mai Timor-Leste.
“Ita sei haree fuzitivu ne’ebé mak mai iha ita-nian rai, ita sei haree buat sira ne’e hotu ho kuidadu ho matenek atu halo desizaun, tantu iha desizaun polítika iha kestaun prosedimentu administrativa bele lao tuir ita-ninian tramita legais liuliu konstituisaun ita-nian no lei kooperasaun internasionál no ita mós keta haluhan ita hanesan Estadu parte ke respeitu ona ba direitu umanus”, nia afirma.
Ministru Justisa halo hela esforsu hodi halo koordenasaun ho Ministériu Públiku no Governu Filipina nasaun orijen fuzitivu Arnolf Teves Jr.
“Ita halo hela esforsu ho Prokuradór Jerál Repúblika tanba ita bo’ot sira hatene nia mak hanesan autoridade sentrál espidientes ne’ebé korespondénsia ba kestaun sira ne’e. Ami iha kontatu ida permanente ho nasaun orijen fuzitivu ne’e nian, idaidak halo nia servisu, maibé ita hotu asegura no garante atu sasan sira ne’e tama iha ita-nian tramitasaun legál, tuir lei Timor ninian”, nia hakotu.
Rekorda fali katak Fuzitivu Arnolf Jr, autoridade PCIC detensaun internasionál iha loron 21/3/2024, iha tuku 16:00 loraik bainhira Arnolf Teves Jr, halimar hela Golf iha área Metiaut.
Autoridade PCIC halo detensaun internasionál hasoru Arnolf Teves Jr tanba tuir PCIC hanesan membru Internasional Police (Interpol) simu informasaun hosi Interpol Filipina no Interpol Internasionál katak Arnolf Teves Jr, molok ne’e nia hanesan autór hodi oho governadór ida iha Filipinana no halai mai tiha iha Timor-Leste, tanba ne’e mak PCIC halo detensaun internasionál hasoru sidadaun ne’e.
Hafoin PCIC halo tiha detensaun internasionál hasoru Arnolf Teves Jr, PCIC halo detensaun kedan sidadaun ne’e iha sela PCIC durante ors 46 hodi submete ba audisaun Interogatóriu dahuluk iha Supremu Tribunál Justisa.
Juiz Supremu Tribunál Justisa aplika medida koasaun Prizaun Preventiva ba Arnolf Teves Jr no oras ne’e daudaun Arnolf Teves Jr sei kumpre medida ne’e iha prizaun Becora.
Jornalista :Natalino Costa
Editór : Zezito Silva
