Top

Xefe Estadu promulga ona alterasaun daruak lei CAC

Prezidente Repúblika, José Ramos-Horta. Imajen Tatoli/Francisco Sony

DILI, 13 maiu 2024 (TATOLI) – Prezidente Repúblika, José Ramos Horta, informa semana kotuk halo ona promulgasaun ba alterasaun daruak lei númeru 8/2009, 15 jullu kona-ba Komisáriu Komisaun Anti Korupsaun (CAC) ne’ebé submete husi Parlamentu Nasionál.

“Iha sesta semana kotuk,  ha’u halo ona aprovasaun ba lei KAK nian.  Aprova lei ne’e atu bele iha eleisaun iha Parlamentu Nasionál ba Komisáriu KAK foun ne’ebe maioria simples bele halo ona votasaun,” Xefe Estadu katak ba jornalista sira iha Palásiu Prezidensiál Dili, segunda ne’e.

Alterasaun ba lei KAK  ho objetivu atu hase’e mós kompeténsia KAK nian ne’ebé iha, iha artigu ida labele interpreta artigu ho singulár no tenke liga ho artigu seluk ne’ebé própriu ho lei.

Lei ne’e  halo alterasaun iha artigu rua ne’ebé konsidera iha problema boot ne’ebé tenke iha konsensu atu hili Komisáriu KAK ho deputadu 49, maibé agora altera ona la presiza to’o iha ne’ebá. Entaun, deputadu maioria simples iha plenária ho deputadu 33 bele halo votasaun ba Komisáriu KAK.

Rekorda fali katak, Parlamentu Nasionál, foin lalais ne’e, liuhusi plenária extraordináriu aprova pedidu urjénsia husi
Governu ba diskute alterasaun daruak husi lei númeru 8/2009, loron 15 jullu, Komisaun KAK.

Durante votasaun hosi deputadu sira rezultadu hatudu a-favór 37, kontra no abstensaun 0, ne’ebé pedidu urjénsia pasa iha Parlamentu Nasionál.

Enkuantu, Agência TATOLI sita tuir Rejimentu Parlamentu Nasionál (RPN) artigu 97.0 (Prosesu urjente), husi alínea 1 to’o 4, hateten ba kualker projetu ka proposta-lei ka rezolusaun bele uza prosesu urjente.

No inisiativa ba prosesu urjente kompete ba Deputadu sira, ba bankada parlamentár ka ba Governu, no pedidu ba urjénsia ne’e haruka ba komisaun kompetente, ne’ebé sei apresia iha prazu oras 24 nia laran, no tenke elabora paréser fundamentadu no paréser ne’e elabora tiha plenáriu sei delibera kona-ba urjénsia no debate.

Rejimentu Parlamentu Nasionál (RPN) artigu 106.º (Prazu mínimu molok debate iha jeneralidade), projetu ka proposta-lei labele debate iha jeneralidade molok liu prazu loron hitu, sura hahú husi data admisaun, la taka dalan ba buat ne’ebé hakerek iha artigu 97.

Nune’e, Prezidente PN, Maria Fernanda Lay, konsidera paresér komisaun nian klaru tebes, hanesan ema hotu hatene komisáriu KAK laiha kuaze tinan ida resin-ona ne’ebé ita tenke rezolve ona.

Notisia relevante: PN submete ona alterasaun lei CAC ba PR

Jornalista: Hortencio Sanchez

Editór: Florencio Miranda Ximenes

Publisidade

Leave a Reply

Latest Post

error: Content is protected !!