Manán Surya Lafaek FC 3-1, Kampung Alor FC lidera provizóriu grupu B
DILI, 14 maiu 2024 (TATOLI) – Ekipa Kampung Alor FC susesu manán nia adversáriu Surya Lafaek FC ho rezultadu 3-1 iha kopa Maun Boot Kay Rala Xanana Gusmão ne’ebé realiza iha Estádiu Munisipál Dili, tersa lokoraik ne’e.
Vitória ne’ebé Kampung Alor hetan lori kedan ekipa ne’e ba tuur metin iha liña dahuluk tabela klasifikasaun provizóriu grupu B ho pontu haat, enkuantu Surya Lafaek okupa iha liña ikus liu ho pontu ida, liña segundu okupa husi Mulia FC FC ho pontu ida, liña terseiru okupa husi Bita-Ba FC ho pontu ida.
Hanesan baibain jogu hala’o iha minutu primeira parte bainhira árbitru fó ona orientasaun jogadór sira lansa kedan kontra no atake ba malu tuir tékniku no abilidade ekipa ida-iadak nian.
Iha jogu ne’e, Kampung Alor lansa presaun maka’as hasoru Lafaek hodi halo jogadór Lafaek book-aan susar iha kampu laran. Ho presaun ne’ebé Kampung Alor halo ikus iha minutu 17 fó duni rezultadu di’ak tanba jogadór Candido de Oliveira (77), hetan oportunidade hodi lansa golu primeiru nakfilak rezultadu ba 1-0.
Ho golu ne’e halo Lafaek nia mentalidade jogu komesa tun no guarda rede Surya Lafaek nian la antisipa ho di’ak nune’e iha minutu 34 treinadór deside dada sai no hatama fali guarda rede João Natalino da Costa (30) nune’e bele salva bola bainhira adversariu lansa sutu ne’ebé maka’as.
Haree ba performe jogadór Surya nian tun maka’as no lakon bola barak liu iha kampo laran, iha minutu 40 treinadór deside dada sai jogadór Natalizio Sang (33) nune’e substitui fali jogadór Miguel Fernandes (6), iha minutu hanesan treinadór dada sai mós jogadór Ageu Lay (69) no hatama fali jogadór Divinio Soares (22) nune’e bele hamoris hikas Lafaek nia jogu.
Bainhira troka jogadór husi Lafaek nian remata minutu primeira parte nian mós termina vitoria provijoriu hela ho Kampung Alor ho rezultadu 1-0.
Dolar ba segunda parte Lafaek hamoris hikas nia jogu hodi lansa kontra no atake maka’as ba Kampung Alor, avansadu Lafaek nian lansa sutu barak maibé sutu hirak ne’e hela de’it hanesan sutu tanba la kona iha alvu.
Husi atake Lafaek nian ne’e halo jogadór Kampung Alor book-aan araska maibé sira nafatin halo jogu ne’ebé brillante hodi kombate atake ne’ebé Surya halo.
Jogu la’o to’o minutu 53 jogadór Lafaek hetan oportunidade di’ak hodi lansa golu ida responde ba golu primeiru ne’ebé Kampung Alor halo nune’e rezultadu hatur ba 1-1, golu ne’e prodús husi jogadór Divanio Soares (22).
Golu ne’e hanesan presaun ida ba Kampung Alor hodi servisu maka’as liutan iha kampo laran nune’e iha minutu 66 treinadór Kampung Alor deside dada sai jogadór Manuel Cristo (6) hodi hatama fali jogadór Mesias da Costa (11) nune’e bele reziste kontra Surya ne’ebé halo presaun maka’as, haree ba jogu seidauk la’o ho másimu treinadór ne’e tenta dada sai tan jogadór Norval Soares (95) iha minutu 69 hodi substitui fali jogadór Michael Soares (47).
Bainhira mudansa jogadór iha kampo laran husi armada Kapung Alor ikus fó duni rezultadu di’ak tanba jogadór sira domina hikas bola nune’e iha minutu 70 jogadór Dezaili Soares (15) halo tan golu ida muda rezultadu ba 2-1. Golu ne’e halo Kampung Alor nia jogu brillante liutan nune’e liu de’it minutu ida iha minutu 71 jogadór Michael Soares (47) responde tan golu ida hodi hatur rezultadu metin ba 3-1.
Husi Golu ne’e mós halo jogadór Surya sira labele ona atu duni tuir tanba rezultadu semo dook liutan kompara ho jogu ne’ebé sira halo Kampung Alor hamate tutuir susar ba Surya atu halo empata jogu ne’e.
Nune’e to’o minutu normál jogu nian termina vitoria save metin ba Kampung Alor hodi loko-aan ba hetan pontu tolu no Surya Lafaek obrigadu tenke hela ho derrota hodi hein fali jogu ikus kontra Mulia FC.
Jogu ne’e dirije husi árbitru prinsipál Pedro Braga, juiz liña Filomeno da Silva, Silbiano Vieira no árbitru rezerva Fernando da Costa.
Notísia relevante:Manán Relay 3-0, Zhavia provizóriu lidera grupu A iha kopa Xanana
Jornalista: Hortencio Sanchez
Editór: Florencio Miranda Ximenes
