DILI, 14 maiu 2024 (TATOLI)- Advogadu no diplomata Norte-Amerikanu, Pierre-Richard Prosper, ho nia ekipa hakarak kontinua fó apoia ba IX Governu Konstitusionál iha projetu reforma infraestrutura no Finansa iha Timor-Leste.
Pierre-Richard Prosper ho ekipa, atualiza kompromissu ne’e liu hosi enkontru ida ho Primeiru-Ministru (PM), Kay Rala Xanana Gusmão iha Palásiu Governu Dili, ohin.
“Kontente tebes bele fila-fali mai Timor-Leste no enkontru ho Primeiru-Ministru hodi ko’alia kona-bá progresu sira ne’ebé asaun ne’e liu ona liuliu ho ezisténsia Governasaun ida-ne’e desde tinan kotuk. Ami ko’alia kona-bá oinsá ha’u-nia ekipa kontinua fó asisténsia ba Governu no inisiativa sira tantu liga ho pojetu reforma área infrastutura no finansa,” diplomata Norte-Amerikanu ne’e hateten, hafoin enkontru ho Xefe Governu.
Alende ne’e, ekipa ne’e mós hakarak haree oinsá bele fó asisténsia bá issue sira hanesan proteje ambiente hosi mudansa klimátika ne’ebé sai mós prioridade Primeiru-Ministru iha Governasaun ida-ne’e.
Advogadu Internasionál ne’e konsidera sorumutu ida ne’e pozitivu tebes no fó-hanoin fila-fali kona-bá relasaun durante tinan 25 ho Xefe Governu.
“Relasaun ida-ne’e bele apoia no kontinua haree progressu no dezenvolvimentu iha Timor-Leste. Apoiu ne’ebé durante ne’e ami oferese liga ho assesoria no Primeiru Ministru rasik ema ida ho vizaun di’ak, planu di’ak, sei hare’e oinsá ami bele fó apoiu ideia sira ne’e,” nia hateten.
Primeiru-Ministru hato’o mensajen no husu advogadu no diplomata Norte-Amerikanu ne’e ho ekipa atu kontinua servisu di’ak hamutuk ho Xefe Governu.
Jornalista: Hortencio Sanchez
Editór : Florencio Miranda Ximenes
