DILI, 14 maiu 2024 (TATOLI)- Primeiru-Ministru (PM), Kay Rala Xanana Gusmão, husu bá instituisaun Polísia Sientífika Investigasaun Kriminál (PCIC, sigla portugés) atu servisu ho onestu no profisionál.
Xefe Governu husu asuntu ne’e iha ámbitu selebrasaun loron ezisténsia PCIC bá dala-10 (2015-2024) ne’ebé hala’o iha salaun Multiuzu GMN-Bebora, tersa ne’e.
“Maske sai organizasaun autónomu ida, maibé servisu labele haluha koopera ho polísia no mós Servisu Nasionál Intelejénsia. Ida-ne’e duni mak ha’u bele sente kontente oitoan tanba imi hadi’a daudaun ona. Ha’u hato’o parabéns bá imi hotu. Tinan-10 tenke halo reflesaun didi’ak ba saida mak imi halo ona. PCIC tenke servisu ho onestidade no profisionalizmu. Ida-ne’e mak ita-nia povu husu,” PM Xanana hatete.
Xefe Governu hatutan, liu tiha tinan-10, tempu ida ne’ebé oportunu tebtebes atu halo reflesaun, tenke servisu hamutuk nafatin atu bele konsolida-an.
Primeiru-Ministru husu ba PCIC atu iha ne’ebé de’it, atividade saida de’it, bele halo ona buat ruma, labele kontente ho ida-ne’e maibé tenke tuur halo reflesaun, halo análiza profunda no krítika atu haree hodi hadi’a buat ne’ebé sala no hadi’a di’ak liután buat ne’ebé di’ak ona.
Xanana Gusmão fó-hanoin katak, tinan oin Timor-Leste atu tama iha organizasaun rejionál Association of Southeast Asian Nations (ASEAN), bainhira to’o ona ajénsia sira hanesan sientífika investigasaun kriminál iha mundu atuál ne’e presiza loke ona hanoin no matan bá rejiaun no mundu, tanba tama ASEAN la’ós prossesu simples atu simu osan ka simu apoiu maibé problema sei barak tebes.
“La’ós buat ruma mosu ona mak ita foin investiga. Ita-bo’ot sira iha diresaun justisa, polísia no husi servisu sira seluk hanesan SNI mós tenke koordena bá malu hodi halu’an imi-nia koñesimentu kona-bá kriminalidade ne’ebé akontese besik ita no hosi ne’ebé do’ok bele uza Timor nu’udár dalan ida bá hahalok krime. Ohin loron ita enfrenta problema ida-ne’e mak ha’u husu tebtebes,” PM Xanana Gusmão husu.
Ezemplu ne’ebé Xefe Governu foti maka, ligadu ho intervensaun ka atuasaun PCIC nian iha tinan hirak liu bá, ema uza Timor nu’udár ponte atu hatama droga bá Indonézia no la hatene buat ne’e mai hosi Amérika Latina bá to’o Índia, Singapura no sira mai simu iha aeroportu lori liu bá Indonézia.
“Ne’e ezemplu ida de’it. Katak, droga ne’e la’ós ita atu haree de’it iha fronteira ne’ebá karik buat ruma atu tama, krime organizadu sira ne’e hosi rai do’ok tebtebes maibé tanba ita la konsege prepara a’an didi’ak atu detekta sira uza ida-ne’e,” PM Xanana dehan.
Tanba ne’e, husu PCIC atu servisu hamutuk ho instituisaun Estadu sira seluk, hanesan Polísia Nasionál Timor-Leste (PNTL) no Servisu Nasionál Intelejénsia (SNI).
Notísia relevante:Ministériu Justisa husu PCIC no DP presta servisu ho kualidade
Jornalista: Hortencio Sanchez
Editór: Florencio Miranda Ximenes
