iklan

JUSTISA, HEADLINE

Arguidu Longuinhos rekoñese rai arma item 24 iha nia rezidénsia

Arguidu Longuinhos rekoñese rai arma item 24 iha nia rezidénsia

Ministru Interior Longuinhos Monteiro. Foto: espesiál

DILI, 15 maiu 2024 (TATOLI) – Tribunál Judisiál Primeira Instánsia Dili (TJPID), iha kuarta (15/5) ohin, kontinua halo julgamentu ba kazu arguidu Longuinhos Monteiro ne’ebé envolve krime rai arma proibida iha nia rezidénsia Liquica no Fomento.

Iha ajenda julgamentu ne’e, Tribunál kolletivu rona deklarasaun hosi arguidu Longinhos Monteiro ba krime ne’ebé Ministériu Públiku imputa ba nian.

Iha sala julgamentu arguidu fó nia depoimentu ba Tribunál hodi deklara ba Tibunál katak faktu hosi akuzasaun hosi Ministériu Públiku ne’ebé arguidu Longuinhos Monteiro rai arma proibida iha nia rezidénsia ne’e los hotu.

Arguidu konfensa katak arma sira ne’ebé durante ne’e, nia iha item 24 hanesan hakerek ona iha akuzasaun Ministériu Públiku nian no arguidu dehan katak arma sira hanesan pistola, Granada, munisaun no arma balun tan, ne’ebé sei rai, momentu sei assume kargu Komandante Jerál PNTL.

Nia konta tuir katak arma sira ne’e, nia rai balun iha Gudan, balun rai iha kontentór no balun rai iha uma laran, só pistola no munisaun mak rai iha armáriu iha arguidu nia tanba pistola ne’e hanesan Komandante Jerál nia tenke iha.

“Sim, faktu sira ne’e los hotu, sasan sira ne’e ha’u nia hotu no prosedimentu buska ne’ebé mak ekipa sira halo momentu ne’e tuir legalidade tanba ho mandadu judisiáriu hosi Tribunál”, Longuinhos hateten iha sala julgamentu Tribunál Judisiál Primeira Instánsia Dili, kuarta ne’e.

Arguidu konfesa tan ba Tribunál katak buska ne’ebe mak ekipa konjunta halo, tuir duni prinsípiu legalidade maibé iha prosedimentu balun mak viola regras no rekezitu legál.

“Ha’u hakarak dehan iha prosesu buska ne’ebé halao iha ha’u-nia rezidénsia iha momentu ne’ebá, ema ne’ebé laos kompeténsia ba mandadu judisiáriu, nia mós halo intervensaun hodi halo buska iha ha’u nia rezidénsia”, nia haktuir.

Arguidu konta katak momentu ekipa sira halo buska iha rezidénsia, hahú iha tuku neen loraik no remata iha tuku hitu kalan, ekipa ne’e kompstu hosi membru SNI, PCIC no Polísia Militár.

Nia relembra, momentu ne’e sira tama ho karreta ba kedan iha uma laran no ekipa tún, sira ne’ebé mak lori mandadu ne’e mak PCIC no ba hasoru tiha arguidu hodi kompriementa katak sira-nia prezensa iha arguidu nia uma atu halo buska, nune’e arguidu foin konversa ho membru PCIC no derepente ema sivil na’in tama ba iha uma hodi hahú kedan buska.

Arguidu hateten, na’in-rua ne’e ema sivil no hateten ba arguidu katak maun koopera de’it ho ami tanba ida-ne’e orden no maun tenke koopera.

Arguidu hateten, ho deklarsaun hosi ema sivil na’in-rua ne’e halo sai konfuzaun no halo arguidu psikolojikamente sente ladún di’ak no ida-ne’e afeta tebes ba nia integridade hanesan umanu tanba buska ne’e iha prosedimentu katak ema ne’ebé lori mandadu hanesan PCIC mak iha direitu atu halo buska, sé laos kompeténsia ba ida-ne’e nia labele halo buska.

Arguidu mós lamenta tanba momentu halo buska ba nia rezidénsia iha Fomentu, envolve mós membru F-FDTL hosi Unidade Polísia Militár. Tuir arguidu katak buska sira hanesan ne’e, tuir lolos labele envolve hosi membru forsa armada, kuandu iha buska maka ema ne’e lakoopera ka hakarak halai hosi buska ne’e bele maibé momentu ne’e arguidu deklara no koopera ho prosesu sira hanesan ne’e.

Longuinhos asume komisáriu no mandate konklui iha 2015. Iha momentu ne’ebá fó ona autorizasaun ba seguransa atu foti save iha uma atu loke kontentór hodi entrega arma sira, maibé momentu ne’ebá nia seguransa lakonsege ba entrega no bainhira ekipa ba buska hetan fali arma no arguidu hakfodak.

Hafoin rona tiha arguidu nia deklarasaun, Tribunál deside kontinua halo julgamentu ne’e iha loron 5 fulan-Juñu 2024, iha oras tuku 16:00 loraik hodi rona sasin sira-nia depoimentu.

Audénsia hosi julgamentu ne’e prezide hosi Juiz koletivu, Juiza Maria Solana, Juiz Afonso Carmona no Albertina Neves Ministériu Públiku reprezenta hosi Prokuradór Domingos Goveia no arguidu hetan asistensia hosi Advogadu Privadu João Paivão Sera.

 Jornalista: Natalino Costa

Editór : Zezito Silva

 

iklan
iklan

Leave a Reply

iklan
error: Content is protected !!