OÉ-CUSSE, 15 maiu 2024 (TATOLI) – Ministériu Solidariedade Sosiál no Inkluzaun (MSSI), sei apoia ai-han no ema ho defisiénsia na’in-581 iha Rejiaun Administrativa Espsiál Oé-Cusse Ambeno (RAEOA).
“Ami simu karta husi Sekretária Rejionál Edukasaun Oé-Cusse, entaun ami mai iha-ne’e, atu haree komunidade liuliu vulnerável sira, ema ho defisiénsia matan, fíziku, apá-amá ne’ebé ferik, moras mentál sira-ne’e mak ita fó apoia,” Ministra Solidariedade Sosiál no Inkluzaun, Verónica das Dores, ko’alia iha salaun edukasuan Oé-Cusse, kuarta ne’e.
Notísia relevante: MSSI koordena asuntu tolu inklui pensaun sosiál ho Autoridade RAEOA
Governante ne’e, informa, ai-han ne’ebé sei oferese iha sub-rejiaun haat, alvu ba ema ho defisiénsia, mak ai-han suplementár, foos, koto, foremunggu, susu-been, mina, sardina lataries, deho no seluk-tán.
Sekretária Rejionál ba Asuntu Edukasaun no Solidariedade Sosiál, Inácia Tamele, agradese tanba apoia ne’e, RAEOA mak hato’o pedidu ba Governu Sentrál liuhusi Ministériu Solidariedade Sosiál no Inkluzaun, bazea ba nesesidade, tanba estoke ai-han iha armajeinamentu menus.
“Apoia ne’e la taka dalan mós ba sira-ne’ebé hela iha dormitóriu, iha madre Dominikana, Franciscana, parókia Pássabe, Oésilo no Nítibe, inklui estudante sira-ne’ebé hela dook husi família, sei sira iha difikuldade ba ai-han ami sei distribui mós tanba proposta balut ama ona.”
Notísia relevante: Prezidente Repúblika apoia nesesidade bázika ba família 77 iha Oé-Cusse
Entretantu, benefisiáriu 582 iha sub-rejiaun Oésilo sei apoia na’in-88 iha suku Bobometo, husi aldeia Oébaha na’in-52, Oénoah na’in-20 no aldeia Nianapu na’in-16.
Iha sub-rejiaun Pássabe sei apoia na’in-275, mai husi suku Abani, aldeia Haemnanu na’in-100, Naetuna na’in-35, Pássabe na’in-90, no iha suku Malelat na’in-50.
Iha sub-rejiaun Nítibe sei apoia iha suku Usitaku, aldeia Poasbot na’in-130. Iha sub-rejiaun Pante Makasar apoia vulnerável 89 mai husi suku Taiboko aldeia Hauboni na’in-45, iha suku Costa inklui dormitóriu Topu-Honis na’in-44.
Jornalista: Abílio Elo Nini
Editór: Evaristo Soares Martins
