DILI, 21 maiu 2024 (TATOLI)—Alarico Almeida eleitu sai Xefe suku Lequitura, postu administrativu Aileu, munisípiu Aileu, hafoin empata iha eleisaun órgaun suku segunda volta iha loron 13 maiu 2024.
Diretór Jerál Sekretariadu Tékniku Administrasaun Eleitorál (STAE), Elviro Fernandes Moniz, hateten, Konsellu suku mak deside data re-eleisaun tuir mai tanba tuir rezolusaun ne’e eleisaun to’o de’it segunda volta.
“Iha eleisaun segunda volta Alarico Almeida Salsinha no José Almeida Salsinha mak kompete, ho rezultadu Alarico Almeida eleitu sai Xefe suku ho votu 269 no Salsinha Almeida hetan de’it votu 257,” Diretór informa ba Agência Tatoli, iha ninia knaar fatin, STAE Caicoli, tersa ne’e.
Notísia relevante : Suku Lequitura Aileu hakat ba eleisaun iha loron 18 maiu
Ekipa imprime buletin votu iha loron 16 maiu no distribui iha loron 17 maiu lorokraik, hafoin kontinua distribui ba aldeia haat iha suku lequitura, no iha loron 18 maiu sei realiza votasaun hahú iha tuku 09:00 dadeersaan to’o tuku 15:00 halo kontajen votu.
Iha ámbitu eleisaun ne’e la’o hakmatek no la rejista insidente ruma ne’ebé perturba prosesu votasaun no kontajen votu.
Suku Lequitura kompostu aldeia haat mak hanesan Erluli, Lequitura, Rairema no Riheun, ho totál eleitór 665 no tuir vota 528.
Jornalista : Arminda Fonseca
Editora : Julia Chatarina
