KAPITÁL

“Dili sai moos, ita hotu tenke ajuda malu,” PAM Gregório Saldanha   

“Dili sai moos, ita hotu tenke ajuda malu,” PAM Gregório Saldanha   

Prezidente Autoridade Munisípiu Dili, Gregório Saldanha. Foto Tatoli/António Daciparu

DILI, 23 maiu 2024 (TATOLI)—Prezidente Autoridade Munisípiu (PAM) Dili, Gregório Saldanha, hateten, hamenus lixu iha kapitál Dili, Dili sai moos, ema hotu tenke ajuda malu.

“Ita servisu nafatin atu lixu ne’e bele menus, nune’e Dili sai moos, tanba ita servisu la para ita ko’alia mós la para, nune’e ema hotu hatoman nia aan; hamoos nia bairru, nia uma, hamoos nia serbisu fatin, dalan públiku sira, la’ós  hein ema sira ne’ebé Governu selu mak hamoos,  maibé ita hotu tenke  ajuda malu   nune’e Dili bele sai moos,” Gregório Saldanha, hateten, ba TATOLI iha  Edifísiu FONGTIL, ohin.

PAM Dili hatutan, “Ami nafatin halo sosializasaun ba komunidade sira katak tau fo’er iha nia fatin, nune’e labele namkari iha dalan-dalan. Se ami sosializasaun mak komunidade sira la rona no la halo tuir mak ami sei implementa sansaun ba sira, tanba ezemplu iha jardin sira ne’ebé mak iha katak, sira han tiha nasi bungkus (etu falun) lixu fatin iha sira-nia sorin, maibé la soe iha ne’ebá maibé soe fila fali fatin ne’ebé mak sira tuur ba ne’e, signifika ita ema nia konsiensia mak la iha”.

Tanba ne’e Autoridade Munisípiu Dili ne’e, husu populasaun sira-nia konsiénsia katak lixu ne’ebé mak iha tenke fakar iha nia fatin, se so’e arbiru mak sei hetan sansaun.

“Lei ne’e impoen obriga ema tenke halo tuir, la kumpri mak tenke hetan sansaun tanba ita ko’alia de’it komunidade sira nafatin so’e fo’er arbiru, entaun ita tenke implementa koima nune’e sira tenke selu,” nia esplika.

AMD mós apela ba eskola sira katak manorin sira tenke hanorin estudante atu abitua soe fo’er. Labele soe foer arbiru maibé tenke soe iha lixu fatin.

Prezidente Autoridade Munisípiu Dili informa mós katak iha fulan-juñu sei utiliza ona ekipamentu modernu nune’e ra’ut lixu iha kapitál Dili hodi ba fakar iha Tibar.

Iha sorin seluk, Xefe Departamentu Sanemantu Munisípiu Dili, Domingos do Santos Soriano dehan, bazeia ba dekretu lei 33/2008 hateten se mak soe fo’er arbiru sei hetan sansaun ho koima hosi $ 5 dolar to’o $500.

“Bazeia ba dekretu lei 33/2008 hateten se mak soe fo’er arbiru sei hetan sansaun ho koima hosi $ 5 dolar to’o $500,” Domingos do Santos Soriano informa.

Xefe Suku Caicoli, Hipolito Marques Sarmento, husu Governu atu implementa lei númeru 33/2008 ho rigorozu nune’e ema hotu ne’ebé mak la kumpri so’e foer arbiru tenke fó sansaun.

“Ha’u husu ba Governu atu implementa lei ne’e ho rigorozu. Se ema ruma kontra lei hodi so’e fo’er nafatin, tenke fó sansaun labele hateke de’it,” Hipolito Marques Sarmento énfaze.

Jornalista : Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!