DILI, 23 maiu 2024 (TATOLI)–Ministériu Saúde (MS) liuhosi Hospitál Nasionál Guido Valadares (HNGV), hahú husi janeiru to’o abríl 2024 ne’e, halo transferénsia ba pasiente hamutuk 236 ba rai-li’ur hanesan ba Indonézia, Malázia no Singapura.
Diretór Servisu Apoiu Diagnostiku no Terapeutiku iha Ospital Nasionál Guido Valadares (HNGV), Vidal de Jesus, hateten kazu ne’e dalabarak HNGV transfere ba rai-liur mak hanesan kardiovaskulár, kankru, medisina internál, sirurjia no pediatria.
“Problema saúde barak liu mak kardiovaskulár no kanku,” Diretór Servisu Apoiu Diagnostiku no Terapeutiku iha Ospital Nasionál Guido Valadares (HNGV), Vidal de Jesus, ba jornalista sira, iha HNGV.
Moras sira-ne’ebé hetan transferénsia ba iha rai-li´ur ne’e kompostu ema idade hosi bebé to’o pasiente sira ne’ebé idade 70.
“Labarik sira mos ami transfere ba rai-li’ur, se nia iha problema fuan hanesan nia fuan ladún baku di’ak. Ida-ne’e ba halo operasaun iha ne’ebá, tanba ita iha ne’e seidauk iha kondisaun halo operasaun,” nia hateten.
Iha fatin hanesan, Diretór Nasionál Apoiu Servisu Saúde iha Ministériu Saúde, Carlos de Carvalho Guterres, hateten primeiru trimestre ne’e iha transferénsia pasiente ba rai-liur ne’e ema na’in-haat (4) mak mate.
“Hela ema 170 no haat mate ne’e iha trimester ida. Pasiente sira barak liu hela iha fatin barak iha Indonézia,” nia dehan.
Jornalista : Jesuína Xavier
Editór : Cancio Ximenes
