MAPPF sei apoia eskavadór ida normaliza irrigasaun iha Bobonaro
BOBONARO, 23 maiu 2024 (TATOLI)-Ministériu Agrikultura, Pekuária, Peska no Floresta (MAPPF) iha tempu badak sei apoia tán ekipamentu pezadu ida atu halo normalizasaun ba irrigasaun sira iha munisípiu Bobonaro ne’ebé pertense ba postu administrativu Maliana, Cailaco no Atabae.
Asuntu ne’e hato’o husi Sekretáriu Estadu Floresta, Fernandino Vieira, hodi responde ba pedidu Prezidente Autoridade munisipál Bobonaro, Alexandrino Pires ne’ebé husu MAPPF atu halo normalizasaun ba irrigasaun.
Notisia relevante: Natar ektare 200 iha Meligo ‘abandona’ tanba irrigasaun la funsiona
“Ministeriu Agrikultura Pekuária, Peska no Floresta, ita iha eskavadór 10, ne’ebé ha’u hatete kedas agora, fulan oin mai ita sei koloka eskavadór ida mai iha-ne’e atubele halo normalizasaun ba ita-nia irrigasaun sira,” nia promete durante halo enkontru koordenasaun ho Autoridade Munisipál Bobonaro, kinta ne’e.
Nia hatutan iha tempu badak governu mós sei apoia tán Tratór boot ba munisipiu Bobonaro atu fila rai hodi hasa’e produsaun agrikola.
Alende ne’e iha tinan 2024 MAPPF mós sei halo konstrusaun ba Irrigasaun Maliana II ne’ebé durante tinan barak ona hetan estragus.
“Agora dadaun iha ona prosesu tenderizasaun,ita espera iha tempu badak bele hetan empreza ida para bele hahú ona obra”Tenik Sekretáriu Estádu Fernandino
Prezidente Autoridade munisipál Bobonaro, Alexandre Pires,konfirma ekipamentu pezadu ida ne’e antes ne’e MPPF apoia la sufisiente atu rezolve problema iha irrigasaun sira hodi fornese bee ba natar.
“Iha Bobonaro maioria natar, bainhira udan para tiha, atu lori fali bee tama ba natar presiza alat berat lori ke’e irrigasaun, tinan ne’e ami atraza oituan, tanba alat berat ida de’it, bainhira mak mai husi Bilimau, Cailaco to’o Maliana, depois to’o fali ba Atabae ne’e tarde tiha ona,” nia informa.
Tuir dadus Sensu Agrikultura ne’ebé Ajénsia Tatoli asesu, Bobonaro iha poténsia ba natar ho nia totál área kultiva ektare 7,663.
Notísia relevante: Lú Olo triste haree natar Maliana nakonu ho fatuk no rai-henek
Jornalista: Sérgio da Cruz
Editór: Evaristo Soares Martins
