PAM Bobonaro husu ba SEF sosa atributu ba CGF
BOBONARO, 23 maiu 2024 (TATOLI)-Prezidente Autoridade Munisipál (PAM) Bobonaro, Alexandrino Pires, aprezenta proposta ba Sekretáriu Estadu Floresta (SEF), Fernandino Viera, atu tau orsamentu hodi sosa atributu servisu ba Korpu Guarda Floresta (CGF, sigla portugés) nune’e bele fasilita hodi halo patrullamentu iha terrenu.
Líder Másimu Munísipiu Bobonaro hato’o pedidu ne’e tanba papél CGF atu asegura rekursu naturál no floresta, maibé durante ne’e observa membru sira halo kontrolu no patrullamentu ba rikusoin sira iha ai-laran ho de’it liman-mamuk.
Notísia relevante: Guarda Floresta 20 iha Bobonaro sei ativu
“Ha’u-nia proposta ne’e simples de’it, tanba ha’u preokupa liu ba imi-nia vida, imi la’o idak-idak, mas imi laiha atributu ne’ebé atu asegura imi-nia vida, imi presiza iha gás air mata, Rádiu Komunikasaun no stick hanesan PNTL nian ne’e,” PAM Alexandrino hato’o kestaun ne’e durante halo enkontru koordenasaun ho Sekretaria Estadu Floresta, kinta ne’e iha salaun enkontru, autoridade munisipál Bobonaro
Nia hatutan, atributu sira-ne’e importante tebes oinsá atu fasilita servisu CGF no salva membru sira-nia vida bainhira hasoru situasaun perigu ruma iha terrenu.
“Sasán sira-ne’e importante tebes liu-liu rádiu, nune’e fasil halo liña komunikasaun ba malu, bainhira iha terrenu hasoru situasaun difisil, imi bele uza meiu ida-ne’e,” nia katak.
Biban ne’e, Sekretáriu Estadu Floresta, Fernandino Viera, konsidera ona no prioriza iha proposta orsamentu 2025 atu rezolve problema ne’e iha tinan oin inklui mos fardamentu no transporte.
“Ita mós preukupa Guarda Florest sira ne’ebé servisu iha terrenu, nesesidade durante ne’e sai hanesan preukupasaun ba CGF, stick, gás air mata, rádiu komunikasaun, fardamentu, transporte, la’ós dehan ita sosa hotu, maibé iha sosa balu de’it, depois mak ita kompleta iha tinan tuir mai,” nia informa.
Nia orienta CGF Munisípiu Bobonaro atu masimiza kontrolu iha terrenu, tanba daudaun aktu ilegál sira hanesan tesi ai arbiru, sunu rai no kasa animál fuik kontinua buras.
Nia rekoñese membru CGF sei hasoru problema oinoin, maibé hanesan servidór estadu tenke asumu nafatin obrigasaun no responsablidade hodi asegura rikusoin sira iha ai-laran liu-liu ai-kameli no ai-dak no seluk tan.
“Ita la’ós hanoin de’it mak lori ema ba tribunál, maibé di’akliu ita halo prevensaun ba aktu ilegál sira, tanba ita asegura didi’ak rekursu floresta sira-ne’e, loron ruma ita-nia reseita mina no gás laiha, nia sei bele subtitui hodi fó reseita ba ita-nia nasaun,” nia hateten.
Enkuantu totál Guarda Floresta iha territóriu nasionál hamutuk 310, husi númeru ne’e na’in-28 kolokadu iha munisípiu Bobonaro.
Notísia relevante: Floresta Bobonaro no PNTL sei atua komunidade fa’an ai-maran
Jornalista: Sérgio da Cruz
Editór: Evaristo Soares Martins
