Floresta Bobonaro no PNTL sei atua komunidade fa’an ai-maran
BOBONARO, 05 marsu 2024 (TATOLI)-Departamentu Reprezentasaun Floresta Planta no Indústria, Delegasaun Territoriál Munisípiu Bobonaro, sei servisu hamutuk ho Polísia Nasionál Timor-Leste (PNTL) atu halo operasaun tama sai suku sira hodi halo atuasaun ba komunidade ne’ebé fa’an ai-maran iha merkadu.
Xefe Departamentu Reprezentasaun Floresta Planta no Indústria, Delegasaun Territoriál Munisípiu Bobonaro, Martinho Bilimau, esplika tuir loloos atividade ne’e realiza iha tinan kotuk, maibé la konsege tanba iha prosesu eleisaun suku nune’e muda fali mai tinan ne’e.
Notísia relevante: Guarda floresta Bobonaro sei halo apreensaun ba kilat-manu
“Ita sei la’o hamutuk ho PNTl halo atuasaun ba ai-maran sira-ne’e depois de Páskua, abríl hanesan ita la’o ona, hahú uluk iha Maliana, ne’ebé ha’u husu ba komunidade hotu-hotu labele fa’an ona ai-kabuar, tenke fa’an de’it ai sira-ne’ebe na’in mate,” nia informa ba jornalista sira iha edifísiu postu administrativu Cailaco, tersa ne’e.
Bilimau subliña, durante ne’e ekipa floresta observa atividade tesi no fa’an ai-sunu barak liu mai hosi suku Ritabou área Biasale, Nunura, área Leo-lima Balibo no Batugade, postu administrativu Balibo.
“Ita-nia haree ai sira-ne’ebé komunidade fa’an, balu na’in monu, maibé balu lae, hanesan iha Balibo maioria ai ne’ebé mak sira tesi, sira halo to’o tinan tolu liu tiha sira ko’a fa’an fali. Ida-ne’e kontra lei floresta artigu 161 katak hasai rikusoin la tuir lei, ita iha kódigu penál artigu 217 ne’e katak sira hasai rikusoin ne’e iha pena,” nia argumenta.
Alende ne’e ekipa konjunta mós sei halo operasaun ba mákina Sensor ne’ebé laiha lisensa inklui kilat-manu ne’ebé komunidade sira utiliza hodi kasa animál fuik.
Notísia relevante: CGF ho PNTL Bobonaro sei halo operasaun iha aréa protezida
Jornalista: Sérgio da Cruz
Editór: Evaristo Soares Martins
